Ich Jorge Abstatz sost Smachte genanth Bekenne in desem offen brife Allen den dy en sehen horen
adir lesen das der Erbar woltochtige hanus Czirub eyne gancze berichtung enczeit on eyntracht
gemacht hot czwuschen deme Ebirdigen herren hern Andris von Lemberg gemeyn Stadhelder
czu Behen aderly Polan (et)c(etera) Och mit willen wissen vnd ganczem rate der eldisten Comptur an
eyme vnd czwuschen mir Jorgen Abstatz an deme andirn teile Nemelich von des gutes vnd vorlberg(es)
wegen kothsdorf genanth uff deme eygen zur Olye gelegen vnd alle seyner zugehorunge nichtis nicht
ausgenomen Also das der benante herre Stadheldir mir Jorgen Abstatz In eyme rechten Erbkawfe
gegebin vnd zu gutem danke beczalt hot eyne Some geldis Nemelich hundirt marg grosschen
noch aussagunge dis vnd Nikel Borelwicz brife dran mir wol genuget hot hyrumme so vorzeye
ich mich mit alle meynen geerbin on rechten nochkomelingen allir ansproche des benanten gutes
kothsdorf on alle seyner zugehorunge wy man do benennen machte vnd globe des in gesampthant
mit hanus Abstatz meyme vettir bey vnsern guten truwen vnd eren mit vnsern geerbin on rechten
nochkomelingen on vor alle dy das benante gut von vnsir twegen machten anfangen deme oftgenan(ten)
Stadheldir seynem ganczen orden on och henczil kachsdorf seynen geerbin on rechten nochkomeling(en)
der izund das selbige gut in besiczunge hot das nymir me anczusprech(e)n noch beschuldigen vmb cleyn
noch vmb gros an sulichir vndirscheyt das der benante henczil seyne geerbin vnd rechte nochkomeling(en)
mit deme gute kothsdorff sullen haben czuthun vnd zu lossen vngehindirt Als oben geschreben stehet
Das daz allis stete vnd gancz sal gehalden werden habe wir ofte genante Jorge vnd hanus Abstatz gevetter
desen brif lossen czegiln mit vnsern anhangenden Ingesigeln Der gegebin ist noch Cristi gebort firczen
hundirt dor noch in deme dreyvndfyerczigisten Jare An deme tage sand Mertyns des heyligen Byschofis