Wir Hedwig vnnd frederich vonn Gotsgnaden Jm Slesien Herczoginne vnnd Herczog fraw vnnd her czu legnicz czum Brieg vnnd czur Slaw Bekennen offintlichin mit diesim
briue allin den die en sehin horn adir lesin das wir obgenante herczoginne als eine wolmechtige vorweserinne des obgenant(in) vnsers lieben Sohns vnnd wir frederich auch obin
genand als ein rechter Erbherre der obgenant(in) Stat vnnd lande Slaw des czu dorff wolbedachtin rath der vnsern vmb vnser mergliczin notdorfft willen vnser vnd vnsir lan=
de besus domitte stuczende vnd vnser schaden vnd erczelus abewendende vorkowfft abgetretin vnnd offgelossin habin vorkowffen abetretin vnd offlossin krafft ditz briues
funff marg geldis Jerlichis vnsers eigen furstlichin Erbgeschossis das wir habin adir gehab(t) habin Jn vnd off vnser Stat Slaw vnd allir Jrer czubehorunge czugeho=
runge der itzuntgenant(in) Stat off iren felden nuczen geniesungen fruchtbarkeitin vnd allin and(ir)n czugehorungin die darczu von rechte vnd aldherkom(in) gehorin adir
gehorin mogin nichtis awsgenomen dem nach was wie man das mit sundirlichin namen adir wort(in) benennen mochte Jn eime namen einis rechtin widirkowffis
vmb funffczig guete fertige hungarissche guldin mit dem czeichen des lawens werunge desir lande die wir redelichin offgenom(in) habin vnd der volkomelichin beczalt sein
gancz wolczudanke vnnd an vnsern nucz gewand habin denselbin czins des Erbgeschossis czugeldin vnd czubeczalin Nemlichin czwene Schog off Sandte walpurgis
tag vndesden nestkomendin anczukomen an guetin fertigin heller(n) werunge desir lande vnnd denne abir czwe Schog off Sandte Mychaels tag neste dornach komende vnnd
also furbasmer alle Jar Jerlichin den vorgenant(in) czins czugeldin vnnd czubeczalin off die obingenante czeit ane alle widerrede vnd behelffunge dem Ersamen vnnd
Erkintigen hern hannese hund bruder des Ordins Sandte Johannis von Jher(usa)l(e)m denselbin czins czuhabin vnd die weile he lebet vnd lebet czugebrauchin vnd frey vnd
vngehindert domitte czutun vnd czulossin vnd nach seime tode die gemeltin czinse komen vnd gefallin sollin an seinen orden wohin vnd czu wilchem hawze he das wirt
benomen nach seime behegelichin willen als ferre her das bey seinem lebin nichtin vorwandelt vnd off wilche czeit Jm solichin czins mochtin beczalt werdin so sollin vnd
wollin wir obirschrebe(n) Jm Jn guetin trewin durch vns adir vnser Amedtlute die itzunder sein adir harnachmals werdin czur Slaw Jn vnd off der egenant(in) vnser Stat
Slaw Rathleutin vnd Burgern pfandes genung czuhelffin vnd mit den pfanden czutun vnd czulossin ane alle rechtis offbietunge gleichsam alle rechte dingelichin do=
mitte begangin wern off der obgenant(in) Rathmanne vnd der Borger czur slaw eigene abintewer gerunge vnd schadin dieselbin funff marg Jerlichis czinsis
wir obgenante herczoginne vnd herczog von vnsern furstlichin gnadin dem egenant(in) hern hannese hund gelegin habin vnd gereicht lehin vnd reichin inkrafft ditz
briues in allir mosse als obingeschrebin steet Also bornemlichin das wir herczog frederich adir vnsir Erbin vnd Rechte nachkomen die genant(in) funff marg gel=
dis Jerlichis czinsis wider abekowffin adir losin mogin vmb funffczig guete fertige hungarissche guldin werunge desir lande wenne wir das thunde werdin vnsere=
delichin vorkowffin czinsin vnd mit harnachgeschrebin Burgermeister vnd Rathmanne der egenant(in) Stat Slaw die itzunt itzunder sein adir hernarchmals werdin
Jn kunfftigin czeiten bekennen solichin obingedachtin vorkowfftin czins vnd globin dem obgenant(in) hern hanse hund vnd allin den die desin czins nach em habin
werdin gutlichin czurichtin vnd czubeczalin off die obgenante czeit alle Jar Jerlichin von vnsern vnd allir vnsir nachkomen Rathmannen czur Slaw wegin nacz be=
falunge vnd geheisse der obingedant(in) vnsir gnedigin hirschafft czusagende vnd czuwarnd vor allin andern czinsin in allirmasse als denne vnser vorfarn vnd wir
solichin czins vormals vnd czu czeiten der genant(in) vnser gnedigin hirschafft Jerlich gericht vnd beczalt habin ane arg vnd vngeferlich in geistlichin vnd
werltlichin gerichte allenthalbin vngehindert des czu orkunde vnd rechtir wissin habin wir obgenante herczoginne in ganczir vollr macht vnsers gnuntin liebin
Sohns doran her seinen stacz willin vnd yowort getan hat desin brieff lossin vorsigilt werdin mit vnseim anhangindin Jngesigil des denne wir gnante herczog
frederich hiraw volkomlichin gebrauchen vnd wir vorgemeltin Burgirmeister vnnd Rathmanne der Stat Slaw vnsir sigil hiraw auch habin hengin lossin
Gescheen vnd gegebin czur Slaw am Sonnabinde vor Symonis vnnd Jude der heiligin czwelffbotin tag Nach Cristis geburd vierczenhundert Jar dornach
Jn dem czwee vnd Sechczigisten Jare doboye seint gewest vnser bisundir liebin getrawin der Namhafftige Nickel Berschdorff konig(lich) hawptman genand
Burkard Schreiberdorff von der Polnisschen Steynam Andreas Goltzsch vnd George von Nemos vnser Cancler vnd obirster Schreiber dem desir brieff
wart(h) entfolin