Wir johann vonn Wartenbergk auff Strakonitz Bemisch priorats des heyligen Johanns jerosolimitani Oberster meister Bekennen vnnd thun kundt hiemitt aller
menigklich so disenn brieff sehenn ader horenn lesenn Nach dem der Jrlauchte Hochgeborne ffurst vnnd her her ffridrich Jnn Schlesien hertzogh zur
lignitz vnnd Briegk (etc) einenn Jrrigenn vortragk Czwischenn dem Wirdigen Gestrengen her ffrancz Reibnicz vonn Reudenn Ritter vnnd Comtthur
czur kleinn olssenn an einem vnnd dem Ernueste valtin Schencke vnnd seinen brudernn Czu weiknucz anders teyls auff gericht vnnd betedingett
hatt das wasser die Olaus betreffendt als hirnach Jnsereirt vonn wortte Czu wortte ffolgett Vonn Gottes gnudenn wir ffrider
rich hertzogh Jnn Schlesien Czu lignitz vnd Briegk (etc) Bekennen vnnd thun kundt mitt disem vnsern brieff als sich ein Czwispaldt des wasser
~vonn wege desselbn~
~seins ordens gunst~
~czur klein olssen~
halbenn der Olaus Czwischenn dem wirdigen Gestrengen her ffrancz Reibnicz von Reudenn Ritter vnnd Comtthur Czu kleinn olssenn an einem
vnnd dem Ernueste valtin Schencke vnd seinen brudernn Czu weiknucz andres teyls gehaldenn So habenn wir gerott dato mitt beider partt
guttn willenn nachfolgenden vortragk Czwischenn Jnen auff gericht Darnach sich beide partt vuff Ewige Czeitt richtn vnd verhalden sollen
nemlich also die Czeitt so das wasser die Olaus in ffullem Gange ist habenn beidenn partt auff Jre mullen wiese vnnd halbe wasser Czu ge
brauchenn genugh dabey sall es bleibenn So aber das wasser klein ist vnnd kein teyll an des andernn schade ein halben wasser genigigh
sein kann So sollenn die Schencke Czu weiknucz oder Jre nachkomende da selbs denn ganczenn lauff des wassers drei tage vnd nacht alein Czu
Jrer notturfft vnnd nutz nemenn vnnd gebrauchnn Nach dem selbign dreyen tage vnnd nachte sall der Comtthur Czu kleinn Olssenn
dasselbige wasser vnd denn ganczenn lauff auch drey tage vnd nacht wie die Schencke Czu seiner notturfft vnd nutz felligklich nemenn
vnnd gebrauchnn Vnnd so offt es die notturfft erffordertt sall es wie abstehet Czwischenn Jnen der massenn gehaldenn werdenn Des
Czu vester vnnd warer bestatigung habenn wir disenn vortragk als beiderteyl lands ffurst Czu gelassenn vnnd wallenn den hiemitt Bestettigett
vnnd beffestigett habenn So hatt sich gedachter Comtthur Czu klein olssenn bewilligett vonn seiner vnnd des Ordens Oberkaitt als dem meister
vonn Strakonitz daruber ein bewiligung vnnd bestatunge aus Czu bringe Bescheenn vnnd gegebenn Czu Olaus am mittwoch nach
Jubilate Jm ffunffczehen hundertt vnd ym sechs vnd dreissigst Jare Vnnd die weill wir dann Czu alle dem was vnserm vnd
des Ordens hewsernn Czu wolfart ffride vnnd einikeitt erschiessenn magk billich vnser ffurwort vnd beystatt gebenn sollenn So schreibn
wir auch mitt ratte kunst vnnd willem vnsere Eldiste Comtthurenn vff iczt gehaldenn Capitull Czu pragan versamblett an stadt des Ordens
Czu abgemelte vor trage Consencierenn vnnd bestatign den selbign vor vnns vnnd vnsere nach komende des Bemischen prioratts Czu Strakonitz
Oberste meistere vnnd Comendeuren Czu klein olssenn icztt vnd Czu kunfftige Czeitt in allenn punctte vnd artickelnn stette fiste vnd vnuer
bruchlich ewigklich Czu haldenn Des Czu vrkundt habenn wir vnser Jnsigel an disenn brieff bey nebenn des Eerwirdign Capituls an hengn
lassenn Bescheenn vnnd Gegebenn Czu pragan ffreitagh nach marie heimsuchung Nach Cristi vnsers lieben herrn geburtt
ffunffczehen hundertt vnnd ym sechs vnnd dreissigst Jare
Nutlas heilig Comtor Czu Braback
Sigmundt Balczk Comtor Czu Oelsz
Nicolaus spottnigl Com Czu troppa
ffr Johanes lommier prior Conets Strakonitz