Von gottes gnaden Wir fridrich Hertzogk zun Schlesien zur Lignitz Briegk unnd des furstenthumbs Munsterbergk pfandtherr Bekennen
hiemit offentlich vor allermenniglich, Demnach der Ernueste unser lieber getrewer Nickel tschetsch zu Grosburgk, auff an
suchen des Eruwirdigen Wolgebornenn Herrnn Johannis von Munsterbergk Obersten meisters des priorats zun Behemen
zu Strakonitz seligenn, vor jhn unnd den Orden, vor eine Summa geldes eingepurgt wordenn, welche er auch allwir hat ent
richtenn unnd gebenn mussenn, unnd nu umb nicht haltunge willenn, nach laut gedachter Herrnn Meisters unnd des
Ordens verschreibunge, das gutt Popelwitz jnn unserm Olischen weichbilde gelegen, unnd zur Comptorey gehorig, mit
Recht eingenommen, unnd darauff zum demuttigstenn gebetenn, wir als der Landtsfurst, wolten jhm solch Gutt, laut seiner
habenden verschreibung, gnediglich bestettigenn unnd confirmirnn, Welchs wir hiemit zun Krafft ditz brieues genan
tem Nickel tschetschen jhm unnd seinen erben, gnediglich bestettigen unnd confirmirnn, der gestalt, das vilgenanter tschetsch
solch gutt popelwitz jnnehaben, geniessenn unnd gebrauchgen sol, Bitzsolange er von dem Ordenn volkommenliche beza
lunge bekomme, oder mit recht aus vilgemeltem gutte gesatzt werde, wie sich dann der Orden selbt verschribenn unnd
bewilliget, getrewlich unnd ungeuerlich, Jedoch unserm furstlichenn Herrschafftenn, lehen, pflichtenn, unnd dinsten gantz
unnschedlich, des zu urkunt mit unserm furstlichenn Anhangenden Jngesigell besigelt, Gebenn zur Lignitz, dinstags nach
Exaudi Nach Christi geburt Jm funfftzehnhundertenn unnd vierundvirtzigstenn Jhare, dobei sein gewest, der Hochgelarte
unnd Ernueste unser Radt unnd lieben getrewen Johann von Laming der Rechten doctor zu Jenckowitz unnd fridrich
von Raderaw zu Ruperstorff, So weart unserm Cantzler Wolffenn Bock vonn Hermsdorff der Rechten doctor disser
brieff beuolhenn