Wir Burgermeister und Rhatmannen beyder Stedt Strakonitz Bekennen offentlich mit
disem unserm Brief vor ydermenniglich, das vor uns Im sitzenden Rathe erschienen Ist,
Der Hochwirdig unnd Wolgebornne Herr Herr Zbinko Berka, Herr von der Daube,
unnd auff Strakonitz, des Ordens Sanct Joannis Hierosolimitani durch Behaim,
Mehern, Slesien, Polen, Osterreich, Steyer, Karndten, und Crain Obrister Maister, Rom(ischer)
Kay(serlicher) Matt(estat) Cammerer, unnser gnediger Herr, vor sich und wegen des gantzen Ordens
unnd uns furbracht, Nach dem und als sich Irrungen und Zweispaldt, zwischen dem
Erlauchten hochgebornen Fursten und Herrn Herrn Georgen Hertzogen zur Lignitz
unnd Briegk, Inn Slesien, S(einer) f(urstlichen) G(naden) an einem, Unnd seiner G(naden) wegen der Comp(en)
tentzen und Ritterlichen heuser, Oelsen, Tinz und lossen, und derselbe underthanen
erhalden, Darinnen an stadt der Romischen Kay(serlichen) Matt(estat) unsers aller gnedi(g)
gisten Herren, Der Durchlauchtigist Furst, und Herr Herr Ferdinand Ertzhertzog
zu Osterreich, unser gnedigister Herr, chriftliche verabschidung, und S(einer) g(naden) zu unnder(wei)
sung derselben notturfftigen beweiß, Compas und furdernuß briefe gnedigist gegeben
und mitgethaillet, Das seine G(naden) demnach zu furderung und außrichtung solcher
S(einer) g(naden) beweißung, vor uns gemechtiget, und gantze volkomene macht und gewaldt gegeben
hatt In der besten und bestendigisten form, weise, und gestaldt, wie es zu Recht und gewonhait
am krefftigisten gescheen und gesein magk, kan oder soll, Dem Edlen und Ehenuesten
Niclas Lossa von Swklan, verwalter der Comenthurey zu Grobnitz, an seiner gnaden
stadt und Inn auffgetragner vollmacht, die beweiß Artickell und positiones zu ubergeben
geburlich Citation und ladung, auch Insinuation und ankundigungen, baider hochgedachter
F(urstlichen) G(naden) unnd di gesengen, unnd was Inn solcher verfurung nach Rechter form von
notten einzubringen und zu bitten, auch ainen oder mehr Anwalden an S(einer) G(naden)
stadt zu undersetzten und zu Substituiren, und denselbigen gewalt wider an sich zu
nemen, unnd sunst alles und Jedes zu thun und zu handlen, Als ob S(einer) g(naden) selbist
gegenwertig weher thun und lassen mochte und wolte, Cum libera darzustehende
was also durch gemelten Anwalden, Niclassen lossaha, hierinnen gehandelt
Stete, vheste, und unuerbruchlich zu halden, Alles Trewlich und ungeuerlich
Zu Urkund und meher sicherhait, haben wir unser Stadt Ingesigel, mit disem
gewald und machtbrief wissentlich auffgedruckt, Bescheen und geben
zu Strakonitz Montags nach Cantate, das ist der funffte tag des Monats May
Im Tausend funffhundert und funfftzigisten Jare