Wir Ferdinand der Dritte von Gottes gnaden Erwehlter Römischer Kaiser
Zu allen Zeiten Mehrer des Reichs in Germanien, Zu Hungarn, Böhem, Dalmatien, Croatien vnd Sclavonien (et)c. König, Ertzhertzog Zu Osterreich, Marggraff
Zu Mähren, Hertzog Zu Luxenburg, vnnd in Schlesien, vnd Marggraff Zu Laußnitz (et)c. Bekennen für Vns mit diesem brieff für Jedermenniglich, Demnach
daß der Würdige Vnser Andechtiger vnd lieber getreuer Norbertus Nicolaus Amelunx, in demütigisten gehorsamb Zuuernemmen gegeben, wie das er durch ein ordentliche Wahl
nach Jnhalt Geistlicher Rechten, vnd eines heyligen Ordens Jnstituto, vnd gewonheit nach Jhm Abbt, vnd Vorsteher des Stiffts vnd Gottshauß Dalen nennet, erwehlt, vnd
Constituirt worden, mit angeheffter gehorsamber bitte, Wir geruheten die Wahl gnedigist gefallen Zu laßen, dieselbe auch Zu Confirmirn vnd Zu bestettigen, Als haben wir
in Kaiser: vnd Königlichen gnaden angesehen, solche eine demütigiste bitt, wie nit weniger auch ein deß gewehleten deß Gottesfürchtigen leben vnd Wandel, vnd andere besonndere Qua
liteten, vnd derowegen solche Election gnedigist Ratificirt, vnd bestettiget. Thun solches auch hiemit wißentlich als Regierender König Zu Böhemb in Krafft diß brieffs, Mei
nen vnnd Wollen, das er Norbertg(us) Nicolaus Amelunx, nun vnd hinfüro angennendt Stifft vnd Closter nach deßselben ding jhrer Geistlichen Rechten, vnd Satzungen nicht al
lein in Spiritualib(us) Zu lob, Ehrn, vnd Ehr deß Allmechtigen vnd fortpflantzung deß allein Seeligmachenden Catholischen Glaubens, sondern auch in temporalib(us) alle derselb
den Vnderthanen, vnd Zugehörigen Zu deß Stiffts Nutz vnnd Auffnehmen, einem beßern Verstand vnd vermögen nach Regiren, die Ordens Disciplin fleißig in acht nehmen, vnd al
les das jenige, was einem getreuen Abbt, vnnd Vorsteher laut vnserer gethanen Pflicht Zu thun, vnd gebühret, auch Zuerhaltung deß Stiffts Vhralten Privilegi(en), Recht: vnd
Gerechtigkeiten nützlich vnnd vonnöthen sein wirdt, jhme Treulich anbeuohlen sein laßen, in obacht nehmen, vnd auffs beste befördern. Gebieten hierauff allen vnd ieden
Vnsern Jnwohnern vnnd Vnderthanen was Würden, Standts, Ambts, oder Wesens die seind, das Sie mehrerwehnten Norbertum Nicolaum vor einen ordentlich erwehlten, vnnd
von Vns Confirmirten Abbten deß Stiffts vnd Closters Dalen erkennen, vnd ehren, Jhn vnderschiedenlich, dann inzigem von Einem Statthaltern in Vnserem Erbkönig
reich Böhemb, das Sie jhme in seiner Jurisdiction Administration, oder was dem geringsen nit beirren, noch dißes andern Zu thun bey statten, sondern jhme vielmehr in al
len billigen Sachen die hülffliche handt bietten, vnd gebührenden schutz halten, denen Ordens brüdern aber, vnnd Zumb Stifft gehörigen Vnderthanen, insonderheit, daß Sie
jhme als jhrem Vorgesetztem haubt allen schuldigen respect, Ehrerbiettung, vnd gehorsamb leisten, auch anderst nicht thun allens bey Vermeidung Vnserer schweren
Straff vnd Vngnad. Hingegen versehen Wir Vns auch gegen jhme gnedigist, Er werde Zugleich dem ienigen, das eine geleiste Pflicht mit sich bringet, Treulich vnnd
gehorsamblich nachkhommen. Zu Vrkundt diß Brieffs mit Vnserem Kaiser: vnnd Königlichen anhangendem grössern Jnsigel bekrefftiget, der Geben ist in
Vnserer Statt Wienn den fünff Zehenden Monats Tag February nach Christi deß lieben herren vnd Seeligmachers gnadenreichen Geburth im Sechs
Zehenhundert Ein vnd fünffzig, in den Reiche deß Römischen im fünff Zehenden, deß Hungarischen im SechsundZwantzigisten, vnnd deß Böhmischen im VierundZwantzigisten