Wir Ludewig von gots genaden Marggraf ze Brandenburg und ze Lusitz des heiligen Romischen reichs oberster
Camerer phallentzgraff bei Rein Hertzog in Payrn und in Karenten Graf ze Tirol und ze Gortz und vogt
der gotshaeuser Agley Trient und prichsen Bekennen offenleichen mit disem brief Umb die mizzhelung und
chrieg die sich zwischen dem durchluehtigsten fursten h(er)n Karln Romischen künig ze allen zeiten mer(er) des reichs
und künig ze peheim unserm genedigen h(er)ren und lieben oheim und zwischen uns bitz da her gehandelt und
ergangen habent Daz wir darumb gantzleichen und mit gutem willen gangen sein auf den hochgeborn fursten
h(er)n Albrechten hertzogen in Oesterreich unsern lieben oheim Und haben dem volln gewalt und macht geben
daz er uns freuntleichen darinne entschaiden mag und sol Und swas auch er zwischen uns darumb gesprochn
oder entschaiden hat oder noch sprichet und entschaidet das wissen und geloben wir staet ze halden und ze volfuren
mit guten trewn one gevaerde Mit urchunde des briefs der geben ist ze passaw an montag nach sant Margreten
tag Nach gots geburt dreutzehen hundirt iar und darnach in dem dreu und funfzigisten Jare