Ich Arnolt vnd Tycman gebrudere von herffeld bekennen an dysem briff allen den dy yn sehen adir horen lesen daz wir mit wol
bedachtem mute mit rechter wissen vnd mit rate vnser ffrunt dem Edeln herren hern Thyme von koldig Camermeyst(er) vnsers h(er)ren des
keysers vnd houb(t)man zcu bresslow sinen Erben vnd nachkomen recht vnd redlich vorkoufft haben allez daz wir in den nachgeschriben
dorffern zcu der glashutten wenigenparde zcu lutbach vnd zcu dem buche gehabt haben mit kirche lenen mit dem leman zcu dem
buche vnd mit allen vnsern ledigen welden holczern vnd gemeynen holczern vnd puschen dy wir do gehabt haben vff den vorgesch(riben)
dorffern vnd gutern dy cinsen renten gulden erugen vnd abley vnd sundirlich mit pergen slichten gruden welden puschen wysen
ackern garten adir vngarten gerten molen Tychen eychsteten wasseren wasserlouften vischerien geieyden vogilweyden vnd byname
mit der iagt dy zcu den obgenanten dorffern vnd gutern gehort vff velden in welden adir in puschen wy wir dy gehabt haben vnd
wy man dy mit sundirlichen worten benenen mochte nichtesnicht vsgenomen vmb czwey hundirt vir schok sobenczendhalbn
mulnir missnenscher groschen dy vns der obgen(ante) her Tyme von koldig genczlich vnd nuczlich vorricht vnd beczalt hat hab(en)
wir dem obgenanten hern Tyme von koldig synen erbn vnd nachkomen dy obgenaten dorffer vnd guter mit allen iren zcugehorunge
als oben geschribn stet vor vnsern h(er)ren den Margrauen von Missen dy von yn zcu lenen gen(ant) vffgelassen vnd sollen yn der vorgesch(ri)
ben dorffer vnd gutern mit allen iren zcugehorungen als oben geschribn stet geweren als in dem lande recht ist Ouch bekenne wir
daz vnser Muter ffrow geisrut dy lenyne genant ir lipgedige an den gutern glashutten wenigenparde luterbach williclich vffgelass(en)
hat vor vnsern h(er)ren dem Marguen von Missen vnd ouch daz buch daz do eygen ist daz sy daz williclich ouch vffgelassen hat als recht
vnd hat sich des mit vns vortragen daz wir doran keyn recht habn sollen noch wellen Ouch habe wir vorgenaten Arnolt vnd Ty
cman gebrude von herffeld gebeten vnsere lyben vettern hern Jon von herffeld Jugman von Mekow vnd ouch hern heynzce vo
buthech daz sy gelobn mit vns an dysem briff vor dy gewer vnd vfflassen vnd syndlich vor Tycman von herffeld wenne der
Myndig wirt daz der ouch dy vorgeschribn dorffe vnd gute vfflassen vnd vorgeren sal vor vnsern h(er)ren den Marguen von Missen
als recht ist Daz wir alle dyse vorgeschribene rede stucke bucte vnd article stet vnd gancz halden wellen an allerley argelist habe
wir vorgenaten Arnolt vnd Tycman gebrude von herffeld vnd mit vns dy vorgeschriben vnser lyben vetten her Jon von
herffeld Jugman von Mekow vnd her heyncze von buthech vnser Ingesigele gehange an dysen briff der gegeben ist nach
crystes geburt Tausent dry hundirt Iar dornach in dem ffunff vnd Sobenczigesten Iare an dem neste Sontage nach postilarty