IN NOMINE
SSMI D. N. D. PII DIVINA PROVIDENTIA PAPAE NONI
JOSEPHUS VALERGA
MISERATIONE DIVINA ET APOSTOLICAE SEDIS GRATIA
PATRIARCHA HIEROSOLYMITANUS
Magnus Ordinis S. Sepulcri Magister etc. etc. etc.

Ex gestorum monumentis habemus gloriosissimos Carolum Magnum Imperatorem Ludovicum VI, Philippum Sapientem S. Ludovicum IX, Philippum Hispan. Regem aliosque magnanimos Duces et Principes catholicae fidei zela-
tores ac strenuissimos defensores, fortissimos diversis temporibus Equites sub quibusdam regulis instituisse ad hunc finem ut S. Hierosolymorum Urbem et Resurgentis Domini Sepulcrum contra Infidelium agressus defendere atque
custodire curarent. Sed tunc praecipue strenuorum hujusmodi militum emicuit dignitas, cum inter Christianorum Principum adversus infideles demandatas expeditiones, praeclarus Dux Godefridus Bullonius, copioso, cruce-signatorum
militum, auspicante Urbano II Pontif. Max. exercitu comparato, innumeram hostium multitudinem, Deo favente, devicit; unde, Hierosolyma capta, ipse unanimi voto, Hierosolymorum Rex solemniter fuit proclamatus. Atque ut
gloriosum Christi Salvatoris Sepulcrum rite custodiretur, nobilissimos viros ejusdem S. Sepulcri milites ex tunc instituisse traditum est, rubeis crucibus in scuto argenteo sculptis, insignitos; quorum postea piissimus Balduinus
summum moderatorem ac magistrum, Hierosolymitan. Patriarcham statuisse perhibetur. Verum, capta iterum, proh dolor! Hierosolyma, et Pastore una cum grege exulare coacto, iterum facta est vidua Domina gentium, et Ordo
ipse S. Sepulcri labescere visus est; donec ad ejusdem memoriam instaurandam Summi Pontifices Alexander VI aliique usque ad Benedictum XIV animum applicuerunt; atque ad augendam fidelium erga sepulcrum Domini religio-
nem, eorumque animos, ad pietatem erga SS. Loca vehementius excitandos, generalibus Ordinis Statutis renovatis, concesserunt ut quamdiu Patriarcha ipse a sua Sede abesse cogeretur, S. Sepulcri Equites a Guardiano Montis Sion
et totius Seraphicae Franciscalium in Terra-Sancta familiae Custode creari atque institui valerent. Verum Patriarchali Hierosolymorum Ecclesia, restituto Pastore decretum est ut ad Patriarcham ipsum, prout antiquitus, hujus-modi
Equitum S. Sepulcri creatio atque institutio, Apostolica concessione, iterum deferretur. Nuperrime vero SSmus D. N. Pius Papa IX, Patriarchalis hujus Ecclesiae jam ab anno MDCCCXLVII instaurator, ad augendam Equestris hujus Or-
dinis dignitatem, atque ut Christianorum studia ad defendendam et promovendam in Locis Terrae Sanctae catholicam Religionem, eorum meritis debito honoris praemio cohonestatis, incenderentur, per litteras Apostolicas «Cum Multa»
in forma Brevis datas sub die XXIV Januarii anni MDCCCLXVIII, generalibus ejusdem Ordinis statutis renovatis, triplicem Equitum classem, determinatis cuique insignibus et vestium forma, in posterum distinguendam, Apostolica
auctoritate sancivit. Nos igitur quos, licet immeritos, ad Patriarchalis hujus Ecclesiae regimen Divina gratiae munus evexit, cum te dilectissimum in Christo Hugonem Principem de Thurn
et Taxis, tum generis nobilitate illustrem, tum catholicae fidei zelo, atque religione erga SSma haec nostrae Redemptionis monumenta, nec non de
Sancta Christi Ecclesia per praeclarissima fidei et pietatis opera valde benemeritum legitimo testimonio noverimus; Meritis tuis, atque operibus,
quantum in Nobis est, digna praemia conferre aequum existimavimus.

Qua propter nomine et auctoritate Apostolicae Sedis te Ordinis S. Sepulcri Primae Classis seu Magnae Crucis Equitem elegimus nominavimus, creavimus, et instituimus; tibi insignia Ordinis pro tuo gradu de more solemniter
conferentes, atque per praesentes litteras ita a Nobis nominatum, institutum atque insignitum declaramus: cum facultate ipsius militiae vestes atque insignia pro tuo gradu deferendi, auream scilicet crucem encausto sanguinei coloris
illitam quae quatuor alias minores cruces e lateribus, haerentes eodemque encausto illitas praecellit e fascia serica praelonga nigri coloris undatique operis a dextero humero ad sinistrum latus oblique pendentem una cum argenteo
numismate insignia ordinis in medio referente sinistroque lateri aptato, cum omnibus privilegiis, gratiis, et praerogativis quibus caeteri ejusdem Ordinis Equites, pro suo quisque gradu gaudent vel in posterum gaudebunt. In quo-
rum fidem hoc diploma manu nostra subscriptum ac pendente sigillo majori Resurrectionis Dominicae ex alba cera confecto, munitum, expediri decrevimus.

Datum Hierosolymis ab aedibus Patriarchalibus die Quarta mensis Maii Anno Domini Millesimo Octingentesimo Sexagesimo Nono
+ J. Patriarcha M. p.

De mandato Exmi ac Revmi Domini.
Josephus Canny
Cancellarius