Wir Smyl Heinke vnd Jeschke gebrudir von fridland geloben alle myt gezampt hant In guten
truwen vngeuindt an arg den edlen manen h(er)n Wocken vnd lazken gebrudern von Crawnaw
das wir sie welln vnd solln ledigen beyde vmb geld vnd vmb alle pfanden wo wir sie vorsatzet
habn es sey an Cristen adir an Juden an allen iren schaden vnd geschee des nicht was sie denne do
von schaden empfingen der sal alczumole gehn vf vnsern schaden vnd nicht vf ire schade dorzu
gelobe wir an arg myt vnsern gutern ab got an vns icht tete In der czeit ee das wir sie geledigte(n)
das nymat neher erbe sal sey vf vnser guter wen dy selbn h(er)ren also das sie dy selbn gut mugen
vnd solln vorkaufen vorczin vnd vorsetzen vnd sich do myte ledigen beyde von hawptgute vnd
von wucher vnd auch von allem schaden wo wir sie vorsatzt habn vnd noch vorsetzen werden
vnd das dy vorgeschrebn rede vnd gelubde von vns gancz vnd festiclich gehalden werde des habe
wir an eyme rechte vrkunde vnser Ingesigel gehange(n) an dysen brief der ist geschrebn vnd gegebn
Nach Cristi geburde dreyczehn hund(er)t Jare vnd darnach in dem dreyvndsybenczigisten Jare an
dem nehesten s(u)nntage vor sente Mariemagdalen