Wir Wenczlaw von gots gnaden Romischer kunig zu alln zeittn merer des reichs vnd kunig zu Beheim Bekennen
vnd tun kunt offenlich yn diesem brief allen den die yn sehen oder horen lesen das wir habn angesehen manigvaldig
stete dinste vnd trewe die vns der Edel wockuch von lantstein vnser oberster camer des kunigreichs zu Beheim vnser
camermeister rate vnd lieber getrewer offt nuczlich vnd williclich getan hat teglichn tut vnd furbas tun mag
in kunftign zeittn vnd habn dorumb ym vnd seinen erben die vesten lipnicz vnd stat dutschenbrode mit allen
iren zugehorungen gnediclich vnd erblich gegebn vnd gebn yn die mit krafft dicz briefs recht wissen vnd kuniglich
macht zu Beheim also das er dieselbn vesten vnd stat von dem Edlen Boczken von podiebrad vnserm liebn getrewn
dem sie vorzeittn von vnserm vater seligen vnd von vns fur vier tausent schok versaczt sein losen sol vnd wir sulln
vnd welln im zu sulcher losunge tausent schok zu hilfe vnd zu stewer gebn die wir ym vf sand merteins tag
den nehsten bezaln welln vnd so er denn dieselbn vesten vnd stat geloset vnd an sich gebracht hat so sol er vnd
seine erbn furbas dieselbn vesten lipnicz mitsampt der egen stat dutschenbrode vnd allen iren zugehorungen als
sie dem egen Boczken versaczt wurden erblich vnd ewiclich an alles widerlosen habn halden vnd besiczen (a)u
vrkunt dicz briefs versigelt mit vnser kuniglich maiestat Inzigel Gebn zu prage noch crists geburt dreiczenhundert
Jar darnach in dem newn vnd sibenczigsten Jare an eynleff tausent Juncfrawen tag vnser reichs des Behmischn
in dem sibenczend vnd des Romischn in dem vierden Jaren