Ich Bohusch von Tubinssem mit meinen Erben Bekenne offenlich an disem briefe allen den die In sehen oder horen lezzen das ich mit wolbedachtem mute mit gesuntem leibe vnd
mit rat alle meiner freunde die Veste Tubinssem vnd daran die dorffer Wilhemowitz Plessitz vnd Slawaticz mit dreyen muelen mit dreyen pflugen akkers vnd mit zweien teichen daran
mit Rossen mit allen akkern gepawten vnd vngepawten mit wisen mit praten mit weide mit wasser mit wasserflussen vnd mit aller vischereye daran mit walden mit gehulcze mit gestreuche
vnd mit allen freyheiten mit zinsen mit nuczen mit weidungen daran mit aller zugehorunge keines vsgenomen wie die mit sunderlichen worten benant mochten werden Inwendig vnd In
wendig derselben dorffern nichts mir noch meinen Erben daselbst aigen herschafft zubehalten sunder mit vollem rechte als ich die vntz vff disen hewtigen tag mit allen iren greniczen
gehabt vnd enlichen besessen han recht vnd redlichen verkaufft hab vmb vierzehenhundert schok prager grossen vnd werunge dem erbarn meryn von Radanicz vnd seinen Erben frey vnd
lediglich zubehalten zubesiczen zuhaben zunuczen zunieszen zuverseczen vnd zuverenden als sie des aller beste wirt bedunken darumb ich vorgenant Bohusch mit meinen Erben
als eyn schuldiger aller diser sachen vnd wir wites Inlant von Tubinssem Jano von mezericz dobesh von eymanicz gesessen zu popowitz heinrich von budyowiz Jano der Junger von
lomipnicz przibiko von strachasich Benesch von horzmicz sulko von koldow vnd wanik von oppatowicz burgen vnd mitgelober mit demselben Bohusschen von Tubinssem vnd seinen
erben haben alle mit gesampterhant bey vnser guten trewen vngedeilt vnd vngesundert an alles arg dem obgenanten meryn vnd seinen Erben vnd zugetrewer hant den Erbarn
philippen von sweynaw vnd albrechten von luczu die vorgenant veste mit allen dorffern vnd zugehorungen als obne ist begriffen vor aller hindernusse vnd ansprache Juden vnd
Cristen Geistlicher vnd werntlicher daran vor aller ansprach der morgengaben vnd absteununge entwerten freyen schirmen vnd beveryn allers gewerhen vnd recht ist in dem
lande zu merhern vnd wo wir das alles nichten teten was obne ist geschribn alszuhant vnser drey vngesundert ob vns obgenant burgen weliche von dem egnant meryn vnd seinen
Erben oder zu der hant wir vns veschriben haben gemanet werden sullen senden vor sich drey tuchtigiste mane von geburt ieglicher mit einem knechte vnd mit zweien pferden
in die stat gigen prunne in eines erbarn manes gasthaws wo In das wirt beweist von denselben meryne leigen vnd leisten als inleigers gewonheit vnd recht ist vnd vs derselben
leistunge nichten komen durch keinerleye sache alszlang vntz die vorgenant veste mit allen obgenant gutern daran alle schaden von der seumnisse der entwernunge mit potin senden
oder nachreisen was sie an eyd redlich mugen beweisen den vorgenant vnser kauffern vnd den getrewen handen gancz vnd gar werden vsgericht vnd entwert vnd vmb die schaden
vergolten Auch ab inder weile es vns obgeschribn burgen indert einer abginge oder sturbe so globen wir bey den egnant trewen alszuhant an desselben toden stat als eyn erbarn
vnd redlichen in vier wochen stellen bey der egnanten busse der leistunge vnd wer ouch disen gigenwertigen vnser brieff haben wirt mit der vorgenant vnser kauffer guten willen
der hat volle recht in allen obgeschriben sachen mit vrkund dis briefes isigel mit vnser anhangenden Ingesigele der gegeben ist nach Criste geburt dreiczenhundert Jare dornach
in dem zweivndnewnczigistem Jare an vnser lieben frawen tag der reinigunge das ist purificacionis