Wir Ferdinand der Ander von Gottes gnaden Erwehlter Romischer Khaiser
Zu allen zeitten Mehrer des Reichs In Germanien zu Hungern Behaimb Dalmatien Croatien vnnd Sclauonien (etc.) Khonig Ertzher
tzog zu Osterreich Marggraff zu Mahrern Hertzog zu Lutzenburg vnd in Schlesien vnd Marggraff zu Laußnitz Bekhennen hiemitt vnd thun khund vor
Jedermennigclich Nachdem vor verfloßenen Jahren vnd zeitten in Vnserm Erbkönigreich Behaimb vnd deßen Incorporirten Landen bei Kriegsleufften allgemeinem aufstand vnd empo
rungen Vnter anderen vilen eingerißnen Vnordnungenn, auch die zum Gottesdienst gestiffte Vnd den Geistlichen zuegehorige guetter vnd einkhommen theils gewaldtsamben theils vnbdacht
samber weiß wider der Fundatorn willen vnd stifftung in frembde vnd Weltliche hendt gerathen Vnd dannenhero die stifft Khirchen vnd Closter auch volgendts der Gottesdienst auß mangel
des Vnterhalts in abgang khommen vnd gerathen; Auch volgendts der Segen Gottes, wie noch teglich die erfahrenheit gibt, entzogen worden: So haben Wir Vnsere sorgfaltige gedanckhen
vor allen dingen dahin gestellet Damitt Wir in danckhbarer erkhennung, des bei widereroberung bemelltes Vnsers Erbkönigreichs Behaimb augenscheinlich verspurtten Gottlichen beistandts
Zuforderst die Ehr vnd den dienst Gottes; Sowoll das aufnehmen der Christlichen Catholischen Religion befördern, Vnd zu dem ende den Khirchen, Clöstern vnd Gottsheußern aufhelffen, Sie bei
Ihren Freiheitten, Priuilegien, Recht vnd gerechtigkheitten, Wie auch den Guettern vnd einkhommen schutzen vnd handthaben; Vnd was Ihnen also vnbillicher weiß entzogen, So vill sich iederzeit
thun laßet widerumb hierzue bringen mögen. Nun Vns dan von dem Wurdigen Vnserm lieben getreuen Caspar Questenberger Abten der Closter Strahoff vnd Selaiv
vnd Præmonstratenser Ordens Visitatorn gehorsambest angedeuttet vnd zu gemutt gefurt worden was maßen das Closter Selaiv in Behmen, sambt allen darzue gehörigen theils in Behaimb theils
in Mahrern gelegenen guettern von vndencklichen Jahren bemelltem seinem orden Zuegehörig, Auch noch bei Menschen gedenckhen, mit einem ordentlichen Abbt vnd Conuent versehen gewesen;
Volgendts aber durch eigen thattliche anmaßung, von den Weltlichen occupirt; Nach ihrent wolgefallen darmit gebahret, vnd endtlich in Carl Iörgens gewalt vnd vermeinten besitz khommen,
Mit demuttigister bitt Wir wegen dieses Iörgens khundtbahren hochststraffbahren Rebellion erweinte guetter Vns ohn alles mittl heimbgefallen, Zueßn Vnseren handen albereit eingezogen worden,
Wie gemeltten ihme Abten zum Strahoff als Visitatorn vnd dem Orden, hierzue gnedigist widerumb Zuerhelffen. Als haben Wir nach eingenombenem vmbstendtlichen
bericht vnd notturfftiger erkundigung aller beschaffenheit, Auch in sonderer erwegung des vleissigen Gottesdiensts vnd der guetten disciplin, So bei mehrgedachtem Orden, in Vnserm Erbkönig
reich Behaimb vnd Marggraffthumb Mahrern gespürt wird ermeltes Closter Selaiv, Sambt allen darzue gehörigen guettern, Rentten, einkhommen, Dörffern, Ackern, Wiesen, Mühlen, Teichen,
Höltzern nichts darvon außgenomben, allermaßen es Inlengst in Vnserm nahmen, von dem Hochgebornen Vnserm Haimb Fursten vnd lieben getreuen Carln Regierent des Haußes Liechtenstain von
Nicolsburg Hertzogen zu Troppaw Vnserm Gehaimben Rath Camerer vnd verordnetem Statthalter in Vnserm Erbkönigreich Behaimb der Wohlgebornen Vnserer lieben andechtigen Marie Magdalena
Trzckin gebornen von Lobkowitz auff Woprzna Smirzitz Tiznitz Kaunitz vnd Swietla Vmb ein Summa der geliehenes geldes Vier vnd Zwaintzig Tausendt schockh meißnisch verpfendet versehen
ben vnd eingeantworttet worden, Mit rechtem wißen wohldedachtem mueth vnd vorgehabtem Rath, aus Königlicher macht vnd vollkhommenheitt als Khonig zu Behaimb vnd Marggraff in Mahrern,
obbesagtem Præmonstratenser orden Vnd an deßen Statt benantem Visitatori vnd Abbten widerumb restituirt, Zuegeaignet, vbergeben vnd geschencket; Vnd volgender gestallt wurcklich eingeraumbt
inen verordnet, das die von mehrerwenttem Abbten allein auß Vnterthenigster guettwilligkheitt hierzugeben anerböttene Zehen Tausendt gulden Rainisch, besagter Trzckin in abschlag Ihres
Pfandschillings hingelaßen vnd Zuegestelt; Mitt dem vbrigen Rest aber der Achzehen Tausend gulden Reinisch Sie auf andere guetter vnder Pfandweiß angewisen vnd versichert werden solle.
Restituiren demnach, vbergeben, Zueaignen, vnd schencken frey vnd vnbeschwert, ihme hiemit vnd in krafft dises Vnsers Königlichen Brieffs, offtgedachtes Closter, Sambt allen darzue gehö
rigen guettern vnd deren pertinentien, wie dieselben nahmen haben mögen, Also, das er, vnd seine nachkhommende Abbte zum Strahoff, baldt nach erlangtem possess, dieselbe Zu der Ehr Got
tes vnd mehrer außbreittung ihres Heiligen Ordens, hinführo ewiglich vnd vollkhomblich als andere ihre gestiffte guetter nutzen vnd genießen mögen vnd sollen, Ohne menniglichen eintrag
vnd hindernus. Dabei Wir Vns auch vor Vns, Vnsere Erben vnd Nachkhommen Khönige zu Behaimb erbietten offtgedachten Orden, vnd ietzigen vnd Khunfftige Abbte zum Strahoff, wegen
aller Zuespruch vnd anforderung, es seient dieselben, auff was weis es immer wolle, gegen menniglich zuvertretten Vnd Sie bei solcher Vnserer Khaiser: vnd Königlichen restitution, genad vnd vbergab
Zuschutzen vnd handtzuhaben Alles treulich vnd ohn gefehrde. Vnd gebietten darauff allen vnd ieden Vnsern Herrn vnd Rittern Officirern in Vnserm Erbkönigreich Behaimb
vnd Marggraffthumb Mahrern, auch sonsten menniglich in gemein, das Sie angeregten Visitatorem vnd khunfftig alle nachvolgende Abbte zum Strahoff bei diser Vnserer dem vilbemellten Præ
monstratenser orden beschehenen restitution Vbergab vnd genad handhaben, vnd verbleiben laßen, Nichts darwider thun, noch solchs anderen Zuthun verstatten sollen Bei vermeidung Vnser
schweren vnnachleßlichen straff vnd vngenad. Zu vrkhund deß brieff besiegelt mit Vnserm Khaiser: vnd Königlichen anhangenden grössern Insigl. Geben in
Vnserer Statt Neuburg, den Vier vnd Zwaintzigsten Monats tag May, Nach Christi Vnsers lieben Herrn vnd Seligmachers Geburtt Im Ein Tausend Sechshundert vnd Zwei vnd Zwaintzigsten, Vnserer Reiche
(etc.)
Ad mandatum Sac(rae) Cæs(areae)
Maiestatis proprium
Philipp Fabricius m(anu) p(ropria)