Wir bruder Ditherich Burgrave von Aldenburch Homaister der pruder des spitales vnser vrowen des teutschenhaus von Iherusalem. virgihen vnd tůn chunt
allen den di disen prif sehent oder horent lesen di nu lebent vnd her nach chumftig werdent. Daz wir mit gemainem rat vnsers capitels da zu Marienburch erlaubt
han dem ersam man hern wlriche dem pharrer von Gůmpoltzchirchen durch gantzer trewe gunst vnd vreuntschaft di er treit zu vnserm heiligen orden vnd sundlich
zu vnserm hause zu wienne ze pawn den dritten alter in der nidern capellen in dem dewtschen haus zu wien. Dar zu man nu haben schol ewigchleich ainen
prister vnsers ordens oder ain werltlichen mit der pruder chlesche der nach sinem tod teglich dar auf sine messe hab. Vnd dem selben prister sol man allew
Iar dinen drumb daz er sines amptes dester vleizzigchleicher mug gesin vnd sin gewant pezzern drew phunt wienner von sinem haus daz er den prudern erlichen
vnd nutzlich gepawut hat vnd dar zu hat er gewen auch hundirt phunt phennig wienner da man vmb kaufet hat daz perchrecht datz Guking. Dar zu
vgihe wir vnd tůn chunt mit gemainem rat vnd willen vnser pruder daz er gestift hat ain pitancz mit achczehen phunten gůtes wienner phennig mit ander
vreunt helf des heiligen ordens der namen man vint geschriben in dem messepůch daz do weilt zu den hantvesten die dar zu geholfen habent der Iar tag man do von
begen schol vnd zwen weingarten datz Guking di er auch geschaft hat zu der e genanten pitancz Dar zu hat pruder Ians der Schůster gewin ain wingarten der da
leit datz průn. Also beschaidenlich daz di weingart vnd di vorgenante gult vnd als vil ir noch gemert wirt nach seinem tod Swa danne pitancz maister wirt
mit der pruder rat an siner stat der schol den prud(er) do von vnd do mit warten vnd geholfen sin ze trost vnd zv ainer pezzerunge an aller minrung irer teglicher pfrůnd
vnde dar vber zv ainer pezzern fůrsicht vnd zv ainer ewigen bestetigung des prifs vnd ander hantvest die im gegewin sint von den Lantaumen prud(er) Ott
von wolschemark vnd pruder Ieschken von Behemen vnd pruder Herman chůdorfer zv den ziten Lantaumen zv Ostreich vnd in Styern bestege wir vnd
bevesten disen prief vnd daz daz stet pleib vnd vngeprochen ewichlich. Dar vber So geb wir im disen prif zv ainer offen vrchunde vsigelt mit vnserm
grozen ingesigl. Dez sint geczeuk die Erbern vnd gaistliche prudern her Hinr(ich) Puse genant groz Commentůr. Hinr(ich) dusmer Marschalk. Sifrit spitaler vnd
Commtůr zvm Elbinge. hartung trapier vnd commtůr zv kirsburg. Ludolf kunig Tressler. her Cristan vnse capelan. hinr(ich) cranchsvelt. vnd Albrecht von
lesten vnse kumpan. hermann(us) vnd Enoch vnse schriber. vn(d) and(er) getruwen vil. Gegeben datz zv Marienburg Nach vnsers h(er)ren gepůrte Tausent Iar. drew
hvndirt Iar in dem seben vnd treissigesten Iar. An sand Bartholomeus tage in vnserm grozen Capitel.