Wir Herman vnd Ditrich brvder von fladndorf veriehn offenleich vnd tvn chvnt allen den
di nv sint vnd her noch chvnftich werdent di disn prief horent oder sehnt lesn daz wir
mit stætigen ræt vnd mit gvtlichem willen aller vnser erben haben reht vnd redleich lazzen
von aller der ansproch di wir haten hinz dem Gotshaus ze chotwaig vm ain phvnt gvlt
wiener phenning di auf ainem halben lehn ligent ze velabrvnn daz haben wir luterleich
getan dvrch vns vnd aller vnser vodern sel willen vnd wellen avch des vorgnanten Gots
haus ze chotwaig fvr all vnser erben reht schirm sein als landes reht ist fvr allen chriech
fvrbas vnd fvr all ansproch Daz dise sache fvrbas stæte blaib an allen chriech haben wir
gegebn dem vorgnanten Gotshaus ze chotwaig disen prief ze ainem vesten vrchvnd besigelt
mit vnsern insigeln vnd ze ainer stætn sicherhait Des sint zevg der mærchart von
ortelbach der mærchart hevsler der sein prvder der ditrich hevsler wolfinch
sein brvder der weichart von polænchainstain Ott von weizznberch fridrich von polænchainstain
pharrer ze sand pæntell vnd ander erber levt den daz chvnt ist vnd gewizzen diser prief
ist gebn ze wienn do von christes gepvrt waren ergangen drevzehn hvndert iar in dem
zehenten iar an vnser vrowen tag ze der liechtmess