Ich Hertneid von Gaehsenjang mein hausfraw vro Margret vnd mein prud(er) Rvdolf
sein hausfraw vro Chvngunt wer iehn mit tůn chunt alln den di nu sint vnd her
nach chvnftich werdnt di disn prief hoernt od(er) sehnt lesn daz wir mit verdahtem mvt
gemåenchleich vnd mit gůtem råt vnd mit aller vnser erbn gvtlichem willen habn gegebn
dem erbarn herrn Apt petern vnd dem Gotzhaus ze Chotweig ze voderist durch Got dar nach
durch vnser swester willen vron P(er)htn di man do hat genomen in daz vrawn chloster
vnsers rehten erb Aegns vier pfunt pfenning gvlt wienner mvntz ze Altenbůrch zwisschn
sand peternelln vnd haembůrch vnd svllen des wir vnd all vnser erbn des vorgnantn her
ren Apt petreins vnd des Gotzhaus ze Chotweig ewichleich sein reht gwern vnd auch schirm
for all ansproch als lands reht ist vnd svlln daz habn auf alln den vnd(er) w(ir) habn in dem
land ze Oesterich wir verzeihn auch dehaimer vogtei auf dem vorgnantem gůt Daz dise sach
forbaz stet bleib vnd vnzerbrochn ewichleich habn wir gegebn dem vorgnantem Gotzhaus ze Chot
weig ze einem stetigem vrchund vnd ze einer ewigen stetichait disn p(r)ief besigelt mit vnsern
insigeln vnd mit vnsers brůder insigel h(er)n Leupolts von Gaehsenjang vnd mit h(er)n Chvnratz
insigel von Arnstein vnd mit hern Wichartz insigl von Arnstein vns(er)s gesweien Des sint
zevg der Ott Zelkinger von Schala der Wichart von Topl der Dietreich hevssler d(er) w(o)lf
sinch sein průder d(er) Ott von Weiznberch der Wichart von Lånsteyn der hauch von
Weinstain Leutwein d(er) chåmrer Chvnrat hvntpech Alber der rihter w(i)s(e)nt von prunn vnd
Jacob der schreiber vnd ander erber levt den daz chvnt ist vnd gewizn Diser prief ist
gebn ze Chotweig do von Christes gepůrt warn ergangn dreuzehn hvndert iar in dem
zehnte(m) iar an sand Stephans tag ze weinahtan