Wier Peter von Gotes genaden ze den zeiten Abpt ze Chotweich vnd dev Samnung do selben ver iehen vnd tun
chvnt allen den di disen prief sehent oder hozent lesen. Daz vns vnd vnserm Gotshaus vnser liebev vrowe vro
Agnes von Gotes genaden weillent Choneginne ze Vngern geben hat einen zehent an dem Pfaffenperg den si
von Niclay dem zehentner von Stain vm ir guet hat gechovffet den si mer denne iechte tag in nutz vnde
in gewer gehabt hat Vnd hat vns auch den selben zehent gegeben iecht vnd redlichen also daz wier in
inne haben schvllen vnde niezzen ewichlichen an allen chrieg in allem dem iecht als in vnser liebev vnd
genadigev vrowe di vor genant choneginne von Vngern inne gehabt hat mit sogtanev beschaidenhait daz
wier allev iaerichlichen vnsers lieben herren Chvnig Andres von Vngern dem Got genade vnd wiertes vn
serv lieben vrowen vron Agnesen von Gotes genaden weilent choneginne ze Vngern Jartag do von begen
schvllen mit messen mit vigilien an sande Felias inpinas tag vnd mit allen gueten dingen als gewonlichen
ist. vnd schol man von dem selben zehent vns vnd vnsern herren an dem Jartag einem iglichem herren
ein trinchen als guetes weins sam der zehent wein ist geben vnde ein richt Vnd schvllen auch wier vnser
lieben vrowen do von begen als Got vber sey gebiut mit allem guetem dinge auf den tag als er gevel
let vnd irs vor genanten lieben wiertes Jartag fuerbaz nach irm tod mit dem irm Jartag begen. Waer
aber daz wier vnsers lieben herren Chvnig Andres von Vngern vnd vnser lieben vrowen siner hovsfro
wen Jartag mit sampt nicht begiengen Jaerichlichen als vor geschriben ist sw daz von vnsern wegen
ab gienge oder gesaumpt wurde. so schol der vor genant zehent gevallen an daz Gotshaws datz Melkche
an allen chrieg mit allem nutze vnd iecht als wier in gehabt haben. vnd schol auch ledich seyn ganez
lichen von vns vnd von vnserm Gotshaus an allen irrefal. vnd ist daz auz genomen mit vnserm guet
lichem willen. Jz schullen auch di herren von Melkch swenne sev der zehent an gevellet vnsers lieben
herren vnd wiertes vnser lieben vrowen der oft genanten choneginne vnd auch ir Jartag Jaerichlichen
dovon begen auf die tage als si gevallen sein mit allen gueten dingen als vor geschriben ist. Vnd daz
dise rede vnd sache ewichleichen vnzebrochen beleib geben wier disen prief ze einem vrchvnd mit
vnserm Insigel. vnd mit des Convents Insigel bestetigt. Der prief ist geben ze Chotweich do man
zalt von Christes gepurde Tovsent Jar. drev hvndert Jar. dar nach in dem viertzehentem Jar
an sand Jorgen tage. :-