Ich Wlrich der Hevsler vergich offenlich vnd tvn chvnd Allen den di nv sint vnd her noch chvnftich werdnt di disn prief ho
rent oder sehnt lesn. Daz ich mit verdahtem mvt vnd mit gvtlichem willen aller miner erbn ze der zeit do ich daz wol moht ge
tvn hon dem erbern Gotzhaus vnser vrowen ze Chotweich in di oblay gegebn im(m)er ewichleich vnd ledichleich ze vodernst durch
Got dar nach durch miner sel vnd meiner hauffrowen vron Wilbirgn sel Got gnad vnd aller miner vodern sel willen ze Lantsivld
vnd ze Nidernprvnn an nevn fvnfzehn schilling gvlt wien(er) pfenning meines rehten erb Aigens mit sotaner beschaidenheit daz
man di selbn pfenning halb sol dienen an des heiligen Chrevtz tach in dem herbst vnd an sand Michels obnt sol man mir min(er)
hauffrowen vron Wilbirgen ierleich vnd allen meinen vodern vigil vnd mess erleich singen vnd der oblay maister herren
vnd vrowen do von ein mol gebn. Vnd halb sol man di pfenning dienen an sand Michels tach vnd an sand Lvcen tach
Avch mir vnd minen vodern vigil vnd mess erleich singen vnd Avch herren vnd vrowen ein mol do von raichen. Vnd daz se
lb gvt sol ewichleich pei der oblay beleibn. daz man daz iht enpfremd noch versetz noch verchavf. Daz vber trett di herrn anders
iht dann vorbenant vnd geschribn ist so svllen ich oder mein erben di selbn gvlt vazzn vnd raichn di mol als vor geschribn
ist. vntz man sich des vmb ewichleich vergliht. Daz vber tvn ich fvrbas chvnd daz ich vnd all mein erbn des vognanten gv
tes sein reht gwern vnd svlln daz dem Gotzhaus ze Chotweich schirm fvr all ansproch. vnd nem iz des deheinen schaden
den svlln wir im abtvn von alle den vnd von habn in dem land ze Osterreich wir habn avch ich noch mein erbn nimmer mer
dehein reht noch dehein voder(n) avf noch avf gvt vnd sol daz Gotzhaus ze Chotweich im(m)er ewichleich seinen frvmen do
mit schaffen als mit anderm seinem gvt. Daz dise sache fvrbas vnzerbrochn vnd stet bleib an allen chriech hon ich dem vor
gnantem Gotzhaus ze Chotweich gegebn disn prief ze einem stetigen vrchvnd vnd ze einer ewigen stetichait vnd sicherhait
beslozzen mit meinem insigel vnd mit der erbern herren insigel meiner vrevnd. hern Wernharts des pfarrer von Ychab
hern Ottn des Zelkinger von Gschala. hern Ditriches von Gesersdorf. des Otten von Weiznberch. Chvnratz des Linder
schmiden. vnd Rvgers von Schonleivn. Diser sach sint zevg. der Wernhart von planchenstain. der Hertweich pochler.
Friderich hevsler. Wernhart sein brvder. der Wernhart hevsler. Friderich der sigzech Wism von prunn. Albreht d(er)
rihter. Thomat der schaffer. Ott chrvtsterer. Englschalch. Levtwein der cham(m)er(er). vnd ander erber levt den diz
chvnd ist vnd gwizzen. Diser prief ist gebn ze Chotweich do von Christes gepvrt warn ergangn. Drevtzehn
hvndert iar in dem viertzehentem iar. an sand Lvcen tach.