Ich Chunrat von Arnstain vergieh offenlaich vnd ain chvnt Alln den di nu sint vnd hernach chvnftich werdnt
di disn prief hornt od(er) sehnt lesn. Daz der erber herr Apt peter vnd d(er) Conuent ze chotweig Aller gemain
echlich mit verdachtm mut vnd mit gutem rat habnt mit mir reht vnd redlich gewechselt. daz si mir habnt gebn
was rehtn erbgutes auz der Oblai ze gerching auf eniem hof. zehn metzn waitzes. zehn metzn chorns. tzainzich
metzn habern. vier ches. zwai hvner. vnd ain gans. So hon ich in mit miner hausfrown vron chvnigunt vnd
aller miner erbn gvtheim willn. ze der zeit do ich daz wol moht getun vnd ich sein vollez reht het. ze wider we
chsel gebn hin wider in di Oblai mines rehten vriem vnd altn erbaigns im(m)er ewichlaich. ze wolfshueln auf
einem hof fvmf schilling pfenning wienn(er) mvntz an sand michelo tach ze fuching auf einem halbn lehn sehtzch
pfenning auf sand michelo tach. ze slemsdorf sehtzehn pfenningolt auf einer wis an sand Eegn tach mit solh
ner beschaidnhait daz ich vnd mein erbn dem vorgenantm Gotshaus ze chotweig daz selb gut svlln schirm fvr All
ansproch vnd des sein auch reht gwarn vnd nem iz des dehainen schadn den svlln wir im abtun vnd sol daz
habn auf alle deu wid wir habn in dem land ze osterich. Daz dise sach fvrbez bleib on alln chriech. hon ich
dem vorgenantm Gotshaus vns(er) vrown ze chotweig gebn disn prief ze einem stetigen vrchond vnd ze einer
stetn sicherhait. besigelt mit minem insigel. vnd mit miner Ohaim insigl. hern ditrichs von hesendorf. vnd
ditrichs des puthperg von wazzerberch. Diser sach sint geug. der stephan von hohnberch. der wichart
von Arnstain. der christan inhouer. der ditrich von weiznbeh. der Ott sein bruder. der Ott von dem Ror.
der Ott weiznberg(er) von Rersperg. ditmar d(er) schaffer. Rudolf der nadler. der Ott von chvffarn. stephan der
neunwalder. magno. fridl holtzer. vlrich der horder. wisint d(er) rihter chunrat d(er) pfaffer. leutwein d(er) chemn(er).
chunrat hvrnbech. englschalch. vnd ander erber leut den daz chvnt ist vnd gewiz. diser prief ist gebn
datz Zeking do von christes gepvrt wazn ergangn. dreuzehn hundert iar. vnd in dem fvmftzehnem iar an
sand Ambrosi tach.