Ich Andre vnd ich Pyltays vnd ich Pyeta Gæthes chind von vrvar weilen Richte(r) ze Chrems wir veriehen vnd tuen chunt
allen den di disen prief sehent oder horent lesen di nu sind oder nach chunftich werdent. daz wir mit verdachtem muet. vnd mit
guetem willen aller vnser erben. vnd mit vnser pesten freunt ræte. dem erbern herren dem Gæntharten vnd seiner samnung vnsers
vrawen gotshaus ze Chotweich. haben erchant irs recht daz si von alten zeiten habent gehabt. daz si vber irn hof dacz Stæyn schullen
haben irn vergen. der si vnd all ir leut di in irn hofen ir tegleich gesind sint. vnd alle ir guet. iz sei wein getraid holcz oder
wie iz genant sei schol vber furen ledichleich an all irrung vnd an allez lon. zewelicher zeit si wellent. Auch habent si daz recht
daz man si vnd ir vorgenant leut vnd allez ir guet schol vber furen an dem obern vrfar ze Stæyn. daz wir zelehen haben von
vnsers herren genaden chunich fridreichs von Rom. an all saumnung vnd an allez lon. vnd dar vmb schullen si vns oder
vnserm erben alle iar geben dacz irn hof dacz Stæyn zwen guet chæs vor sand Michels tag. vnd zwai pfunt pfenning wienn(er)
münizz an sand Merten tag. vnd swa si des nicht tæten. so schull wir si so lang irren an dem vrfar vncz wir des
chæs vnd der pfenning gewert werden. Vnd dar vber ze vrchund diser sach. geb wir. den vorgenanten erbarn herren
Apt Gænth(art) vnd der samnung vnser vrawen gotshaus ze Chotweich. zu ainer ewigen bestætigung. disen prief versigelt mit
vnser pesten freunt insigel. wan wir zden selben zeiten nicht aigner insigel heten. mit vnsers ænn insigel her Gundakers purger ze
Passau. vnd mit hern Albers insigel des schenchen vnsers gesvater. vnd mit hern Jacobs insigel des Gæzendorff(er) zden zeiten richter
dacz Chrems. vnd mit Rvdolfs des Gærger insigel abtæler zden selben zeiten. Diser sach sind gezeug her Ians vnd her Leutolt
von Chunning. her Ort von Wezzenberch her Görg sein prueder. her Wernhart von Ruzdorf her Chuonrat sein sun. her Hæuch
der Wætenstayner her Pæter von Gfæld. Wlfint von Zwentn(dorf) Ians der richter ze Mautærn. Hainrich von Pölch. Leupolt der
alt richter ze Chrems. Hainrich pei dem vrithof vnd Andre sein prueder fridrich Phuefchel Iensel Cholmans sun Andre Gæzel.
Hainrich der Pfæffinger purger ze Stæyn. vnd ander erber leut den di sach wol chunt ist. Der prief ist gegeben vnd
ditz ist geschehen do von christes gepurd ergangen warn dreuzehen hundert Iar dar nach in dem Neunczehenten iar des
mitichen nach dem palm tag dacz Stæyn in dem hof der vorgenanten herren von Chotweich.