Ich Rvdolf der kvnt von potendorf. Vergih vnd tvn chvnt allen den die disen prief lesent
oder horent lesen. die nv lebent vnd hernah chvnftich sint. Daz ich mit wol verdahtem mvte
zv der zeit do ich iz wol getvn mohte. an meinem tottbette geschaft han. meiner mvter.
vrovn chvnigvnden. einen weingarten der da leit enhalben der Leita datz dem vewern hoflein
also daz mein mvter vro chvnigvnt. sol fvrbaz nah meinem tode. mit dem vorgenanten
weingarten. allen irn frvmen schaffen. verchavffen versetzzen. vnd ledichlichen geben swem
si welle an allen irrsal. Daz ditz geschafte. fvrbaz nah meinem tode also stæt vnd vn
verwandelt beleibe. dar vmb so gib ich Rvdolf der kvnt von potendorf. meiner mvter
vrovn chvnigvnden. disen prief zv einem sihtigen vrchvnde. vnd zv einem waren ge
zevge diser sache versigelten mit meinem insigil. vnd sint avh des gezevg. mein chap
plan her Hainrich der priester. Otte mein schaffer der Dvrhsatz. chvnrat der pleinekker.
Dietrich der wiersinch. Hainrich der samler. vnd ander frvme levte genvch. den ditz ge
schafte wol chvnt ist. Diser prief ist geben ze wienne do von christes gebvrt waren
ergangen drevzchen hvndert iar. in dem nevntzehenten iar dar nah. des nehsten samz
tages. nah sand Lvcen tage