Ich Hainreich d(er) Fuzel und ich Margret sein Hausvrowe wir verjehen und tůn chund allen den di disen prief sehent
oder horent lesen di nu sind od(er) hernach chunftig w(er)dent daz wir mit rechtem mvt und mit gůtleichem willen
aller unser erben un(d) mit gesamt hant ze d(er) zeit da wir iz wol getůn mahten habn verchauft unser rehten Aygens
einen hof ze Rist da man jaerleich von dient des ersten an gůt(er) Eysen eht ainen eym(er) Weins und ainen
eym(er) hab(er)n und zwelfchæs der chæsen ze den drein hohzeiten und zwo genæzt sems und zeh(e)n vaschang hůnn(er)
und zehen ayr ze d(er) vaschang mit allem dem nvzz und reht als wir in un(d) unser erben in Aygens reht her habn praht
und mit alle dem daz dar zů gehort ze dorf ze veld esichs od(er) unvisichs wie daz genant ist dem erbm(an)n
Wisenteen dem Pveznich(er) und sein Hausvrowen vrowen Diemůten und ir paid(er) erben umb vierczig phunt phenning wienn(er)
munzz di wir aller reht und redleich sein gewert furbaz immerm(er) ewicleich und ledichleich ze habn ze seczen ze schuffen
und allen iren frumen da mit ze schaffen wie in lieb sei an allen irrsal und an allen chrieg und dar uber ze ein(er)
rehtn sicherhait gebn wir uns ich vorgenant(er) Hainreich d(er) Fuzel und ich Albreht sein pruder und ich Chůnrat von
Altenburch und alle unser erben unschadenleich ze wern gehaim und gewer fur alle anspurch als Aygens reht ist
und gewonhait des landes in Osterreich wær ab(er) daz di vorgenanten Wisent d(er) Pveznich(er) und sein Hausvrowe
vrow Diemůt od(er) ir erben deheinen schaden dar an næmen mit reht den schull wir in gæntzleich und gar abtůn
dar umb des niht so schullen sev iz habn auf alle dem un(d) wir habn in dem lande ze Osterreich und schull in des
der furst od(er) swer an sein stat haubtman ze den zeiten ist in Osterreich als vil in antwurten an chlag und an
frevel daz in ir schad werd gar abgetan daz dise red also stæt und unczeprochen beleib dar umb geb wir
di vorgenanten ich Hainreich der Fuzel und ich Albreht sein pruder und ich Chůnrat von Altenburch disen prief
ze einem urchund und ze einem waren gezeug mit unsern drein Insigeln besigelten dar sind auch gezeug h(er) Ulreich
der Wulf von Gůtenthal her Wernh(er) von Emling her Hertneid d(er) Fochler h(er) Ulreich von Pæmgarten her
Eberhart d(er) Gewech Gotsrid d(er) Giezzincher Dietreich sein pruder Wulfinch von Inning Hainreich d(er) Wulf und
and(er) frum leut genůg den di red wol chund ist der prief ist gegebn da von Christes gepurd waren
ergangen dreuczehen hund(er)t jar und zwainczig jar dar nach in dem ersten jar an unser vrowen abent
ze der liechtmisse