Ich Sifrid von Hvnrichstorf vergich mit disem brief vn(d) tvn chvnt allen den die in lesent od(er) horent
lesen Daz ich mit emsiger bet geworben han von minem herren abt Gotschalke von Chotwich
den zehent den er hat dacz sint petronellen Daz er mir den selben zehent lazzen hat durch
miner bet vn(d) durch miner dinst willen hvn(d) daz jar vmb zehen mv(e)t getydes des sullen
sin zwen mv(e)t rokken drey mv(e)t waiczes vn(d) fvnf mv(e)t hab(er)n vn(d) han ich im
gelobt mit minen ewen vn(d) mit disem brief daz ich in noch sin Gotsus furbaz an den selben
zehent nim(er) irren sol mit mir selb noch mit nieman an als vil an ich sinen Gv(e)ten
willen dar zv(e) verdienen mag vn(d) swem er den selben zehent furbaz lehen wil dem sol ich fridlich
sin vn(d) ovch dar an minen h(er)ren den abt fridn an alles gever vn(d) gib dar vber disen brief
besigelt mit minem Insigel Der brief ist gebn ze wienn an sant Vites tag nach Gotes
Geburd drevzehen hvnd(er)t jar dar nach in dem ain vn(d) zwainzigistem jar