Ich Asper herr Wernharts sun von Rabenstain vergich und tuen chund allen den die disen brief sehent lesent
oder hoerent lesen die nu sint und her nach chunftig werdent daz ich mit wol verdachtem muet und mit
aller meiner erben gueten willen ze den zeiten da ich ez wol getuen mach han gegeben die chirchen datz
hoffsteten die mein und meins vater dem got genad rehtez aigen gewesen ist mit alle dem und dar
zue gehoeret versuecht und unversuecht und ouch die lehenschaft die ich dar an gehabt han unser frouen
Gothaus hinz choetweich und uch Asper charchnern und der samnung da selb allen inen frum da mit ze
schaffen als mit anderm irem aigen an allen irrsal also mit uzz genummen red daz ich der selben chirchen
datz hoffsteten und alles daz da dar zue gehoeret vogt und schirm schol sein an allen schaden und an all
vordrung an als vil daz mir der pfarrer von hoffsteten swer der ist alle jar an sand cholmans tach
geben schol ainen lemberinen peltz der scheichs schilling wert sey wiener pfening zue ainer ver
chund der vogtei und ouch umb mer und dar umb daz ich die aigenschaft der chirchen datz hoffsteten
und alles daz da dar zue gehoeret gegeben han dem vor genanten Gothaus datz choetweich schol man mir
und meinem vater dem got genad und ouch allen unsern vodern selen ainen ewigen jartach alle jar
tuen paident conuenten paident von herren und von frouen datz choetweich und ouch datz der chi
richen datz hoffsteten begen daz neysten tages nach sand Jörgeins tach und setz ouch mich und mein
erben der vor genanten chirchen datz hoffsteten und alles daz da dar zue gehoeret schirm und gwern
nuet alle an sprach als lants reht ist in osterich dar uber daz disew red staet und unze
brochen beleib gib ich vor genanter Asper von Rabenstain disen brief ver sigelt und bestetigt
mit meinem Infigel und sint ouch gezeug diser sach die erbern herren herr chustam der duchs
fritz von lengpach herr otto von zint herr haynrich von polnhain mit Iren Infigeln dar nach
sint ouch gezeug diser sache herr dytreich von pillichdorf ze den zeiten haubtman in osterich
herr weichart von topel ze den zeiten lants richter in osterich herr cholo von sunstain herr
Cundacher von Rotsperg herr wernhart von hozdorf herr paerchtold der chling herr dietmar
der zot und andern piderb lewt genueg den disew sache wol chund und gewizzen ist diser brief
ist gegeben datz sand poelten in der stat do von christes gebuert waren ergangen drewzehen hun
dert jar dar nach in dem drew und zwainzigsten jar des suntags in der aister vasten