Ich Fridreich von Planchenstain zv den zeiten Pharrer datz sant Peternelln. Vergich vnd tvn chvnt allen den die disen brief le
sem oder horem lesen. die nv lebent vnd hernach chvnftich sint. daz ich mit gutem willen vnd gunst meins wirtes dez erbern her
ren Pruder Otten zv den zeiten Apt datz dem Choetweige der der vorgenanten meiner chirchen rechter Lehen herre ist hin laz
zen han. Dem erbern manne hern Vlreichen dem Tevrerer purger ze wienne vnd seiner hausvrowen vron Gedrauten vnd irn
erben Allen meinen zehenten den ich han datz Gvnchleinstorf pei sant peternelln paidev grozen vnd chlain ze velde vnd ze dorf
swie so der genant ist. vnd mit allem dem nvtz vnd recht als er von alter her chomen ist von dem hevtigen tage vber
Zwai iar in ze nemen vnd ze vtzen allen den nvtz der in den selben zwain iarn von dem egenanten zehenten wirt oder
werden mage ze gleicher weiz als ich selber vmb ains vnd zwaintzich phvnt wienner pheninge der ich recht vnd redleich
gewert pin. So beschaidenleich swenne die zwai iar avs choment so sol mir vnd meinen nachchomen vnd der egenanten
meiner chirchen denne der zehent wider von in ledich sein an allan chriege. Wær aber daz daz got nicht engebe daz
ich in der zeit nicht enwær. swer denne nach mir datz sant peternelln pharrer wirt der sol in den zehenten dennoch
die zeit aus lazzen an alle wider rede in dem recht vnd vor verschriben ist. Wær aber daz in in der selben vrist von ge
waltiger hant an dem zehenten iht geschæch also daz si sein entwert wurden. daz sol ich in aus pringen an allen irn scha
den daz lob ich ze laisten mit meinen trewen. vnd soln auch si daz haben auf mir vnd auf chvnraden dem cholswartze
von Zegelprvnne vnd auf hiessen dem Gevadter von sant peternelln die ich in zv sampt mir dar vmb vnverschaidenleich
ze purgel gesatzt han vnd soln dennoch den zehenten hin nach inne haben so lange vntz daz si alles dez nutzes der da nv
wirt dez si mit gewaltiger hant entwert werden gar vnd gæntzleichen da von verricht werden vnd so daz geschiht so
sol aber der zehent von in ledich sein. vnd sein auch wir dez selben zehentes die zeit aus ir rechter gewer vnd schirm
fur alle ansprach nach dez Landez recht ze Oesterreich. Vnd gib in dar vber disen brief ze einem vrchvnde versigilt mit
meins Lehen herren vnd wirtes Insigil dez vorgenanten Apt Otten datz dem Choetweige mit dez hant vnd willen die
sach gewandelt vnd geschehen ist. vnd dar zv ich egenanter fridreich mit meinem Insigil versigilt. Diser prief ist
geben ze wienne da man zalt von Christes gepurt drevtzehen hvndert iar in dem Sibent vnd Zwaintzigisten iar
dar nach dez næchstem Samtzages nach vnser vrawen tage der Liechtmesse .:-