Ich Vlrich von fraundorf. vnd Kvnig mein hausvrowe. vnd ich Johans. vnd ich Awolf. vnd ich Margareta.
vnd ich Vlrich. vnd ich hauch. vnd ich weithart. vnd ich friderich. seiner chint. wir veriehen an dem
brief. vnd wir thunt chunt allen den die in lesent oder horent lesen. die nv lebent oder hernach chumftich wer
dent. daz wir mit gesamter hant. vnd mit wol bedachtem mute. vnd mit rat vnser besten
vreunt. zv der zeit do wir es wol getun mohten. verchoufet haben. vnd auch auf gegeben haben. dem
erberem chnechte Alberen. vnd siner hausvrowen. wilbirgen. vnd allen sinen erben. vnsers rehten aigen
aygens ain gantzes lehen. daz fraundorf. mit allem dem reht. vnd mit allem dem nutze. als wir es vnd
vnd vnser vordern. mnutze. vnd in aigens geber her braht haben. ze velde. vnd ze dorfe. gestiftet vnd vnge
stiftet. versuchet vnd vnversuchet. vnd wie daz vallet. Alber der vmb hat gegeben. zwai vnd sech
zich phunt wiener phenning. vnd hat vns des veriht. vnd getun ze rehten tagen. an allen vnsern
schaden. wir sullen im auch dem e genantem. Alberen. vnd siner hausvrowen. wilbirgen. vnd allen sinen erben.
vnd auch allen sinen nach chomen. daz selbe lehen. vnd die aigenschaft schirmen. vnd verantwurten. vor aller
ansprach. als aygens reht ist. vnd des landes reht in Osterreich. daz hab wir in. dem ofte genantem Alberen
vnd siner hausvrowen. wilbirgen. vnd allen sinen erben vnd andern sinen nachchomen. gelobt mit vnseren
trewen. vnd sullen es haben. auf aiden der vnd ich vorgenanter Vlrich von fraundorf vnd mein hausvrowe
Kvnig vnd miner e genanten chint. Johans. Awolf. Margareta. Vlrich. hauch. weithart. vnd friderich
haben in dem lande ze Osterreich. vnd sullen da von gewert werden. mit vnserm gutem willen an chlag. vnd
an allav teidinch swa sev des deheinen schaden nemen. Daz daz also stet beleibe vnd vnzebrochen. vnd
auch des fur baz dar an iht verrizzen werde. des gebe wir in vrchund disen brif. mit minem insigel
Vlriches von fraundorf. vnd mit mines sunes Vlriches insigel. vnd mit mines sunes hargans insigel. ver
sigelt. zv ainem gezeug der warhait. wand die andern miner chint niht insigel habent. dar sint
gezeug mit iren insigeln. Otte von sizendorf. Rudel trezzedler. vnd Vlrich der locher. sein sint auch
gezeug an inhen. vnd Vlrich von felabrunne. Otte der grazzer. Rudel der locher. Stephan der locher.
vnd Otte der locher. vnd ander erber leut der der sache wol chunt ist. Der brif ist gegeben.
nach christes geburt drevzehen hundart Jar. vnd in dem drevzzigistem Jar. des suntages nach
sand gallen tag.