Ich Seyfrid von Danolarn purger ze Getin vnd mein Hausvrow Katrei vnd alle vnser erben tuen
chunt in disem prief vnd chunt allen den die in sehent oder horent lesen die nu sint vnd
her nach chvnftich wernt Daz wir mit wol bedachtem muet ze der zeit do wir ir wol gesin
mochten nach vnser pesten sinne rat vnd gunst ze chouffen haben gegeben Hern Vlreichen
ze der zeiten Hof maister in Gotweyg Hof ze Getin ein halbs phunt phenning wienn(er) mvntz recht
gut Auf Vlreichs des smids haus nider halms daz man im alle Iar do von dienen schol
mit alle dem rechten vnd nvn ir vns gedient hat ze Huber r(echt) vasten gedechtnus phennig vnd
an sand cholinans tag gedechtnus phenning gestad des Iars an ewelichem tag im daz ze seczen
wiert So get wandel dar auf als dinstes recht ist in dem lant ze Osterreich I(ch) schol auch
der e genant Vlreich allen seinen frum schaffen mit chouffen oder mit ze seczen oder geben
wem er wil den e genanten gelt an allen irr sal Daz do red stet beleib vnd fur baz vnzer
brochen der vber geb wir im disen prief Ich vor genant Seyfrid mit meinem Insigel
ze einem vrchund vnd ze einem waren gezeug Herr Iacob vnd hat sein selbes insigel wend er
ze der zeit des vor genanten hauss gwer chnapp gewesen ist Der prief ist gegeben
Nach chrystes gepuerd drevzehen hvndert Iar dar nach in dem fvnft vnd dreissigistem
Iar des nisten svntags nach dem vaschang tag ze Getin in der erde