Ich Eberhart von Hazenpach und ich Agnes mein hausvraw wir tuen und tuen chunt allen lauten di nu lebent oder her nach chunftig werdent
daz wir mit gesamter hant und mit gunst aller unser erben zechauffen haben gegeben dem geistleichen mann her(n) Otten dem lochlar ze den
zeiten pharrer dacz sant veit unsers rechten aigens ein zwelif phenning guten schilling geltz daz da gelegen ist in dem swarczen
pach auf drein gueten in der grueb an der ainn an der andern smalczgrub und daz man dient an sand Michels tag umb achczehent
halb phunt phenning wienner munzze der wir recht und redleich gewert sein und seczen uns auch daz wir genanten guetes ze
schirm und ze gewern Ich vorgenanter Eberhart und ich Agnes mein hausvraw und Dietreich mein geswei von muersteten und Ot
mein geswei von muersteten als aigens recht ist und dez landez gewonhait in Osterreich Daz disew sach stät und ungebrochen be
leib gib ich vorgenanter Eberhart ze einem waren zeug disen prief versigelt mit meinem insigel und mit meines geswein Diet
reichs insigel von muersteten und mit meines geswein Oten insigel von muersteten di der sach mit sampt mir schirm und gewer
sind und ze ainen zeug dez erbern riters insigel her(n) Nyclas dez rämspaur und ist der sach zeug Dietolt der eberstorf und
ulreich am hof und ander erber läut genueg Di sach ist geschehen do man zalt von christes gepuerd dreuczehen hundert jar
und darnach in dem zwai und vierczigisten jar an unser frawen tag ze der liechtmizze