Ich Ott der Chayser purger ze Nemburch chlosterhalben . vnd mein Hausfraw vnd vnser Erben . Veriehen offenleich andisem brief
vnd tůn chunt allen den . die in sehent . oder Horent lesen . Daz wier vnsern weingarten in dem Velegraben des ein halbes Jauch ist
mit allen dem Rechten . als wier in in nutz vnd in perthrechtz gwer her pracht haben . gestift vnd vngestift . versuecht vnd vnver
suecht . swie daz genant ist . Vnd do man alle iar von dient . Dem erbern Ritter Hern Hansen dem Greyffen . Hern vitail weins
vnd zwo staiff . zu rechtem perthrecht . vnd zu dreyn täydinge im Jar . zu einem ychleichen einen halben phenninge ze voitrast
vnd nicht mer . Den selben weingarten haben wier Recht vnd redleich verchauft mit vnsers perthmaisters Hant Fridreichs
des mdennseer zu den zeiten amptman des vorgenanten Hern Hansen des greyffen . vnd ledichleich gewen Den Erbern geystleichen
Herren Abpt Wulfingen ze Chötweich vnd seiner samening in ir Oblay . Vmb Siben vnd dreizzich pfunt vnd vmb ein hal
bes pfunt phenninge wienner gemainer münizz . der wier gar vnd gantz gewert sein allen ieren frumen do mit ze schaffen
mit versetzen mit verchauffen geben swem si wellen als in aller peste fuegt . Wier setzen auch vns des vorgenanten weingar
ten . vnd alles daz dar zu gehort ir recht schirm vnd awer fuer allen anspruch als Landz recht ist ze Osterreich . Wær
aber daz in mit einem Rechten dar an icht ab gieng das sullen sew haben auf alle dem vnd wir haben in dem Lande ze
Osterreich wier sein lemtich oder toed . Vnd dar vber zu ainer bestetigung gewen wir in disen offen brief versigelten .
mit des vorgenanten perthmaister insigel fridreichs des mdennseer . vnd mit Gytels insigil seins prueder . Dar zue ist Auch
der sach ge zeug mit seinem insigil der Erber man Hans pei dem tor . vnd ander erber leut genueg . den di sache wol
chunt vnd gewissen ist . Der brief ist gewen nach Christi gepuerd dreitzechen Hundert Jar . dar nach in dem funf
vnd vierzigistem iar an sand Johannes tag ze Suninwenten :~