Ich Chunrat der Phäning von Eystorff vnd ich Dorothe sein hawsfraw vnd all vnser erben tuen offenleich mit dem prief vnd chunt alln
lewten chünftigen vnd chünftigen die in ansehent oder hörent lesen mit wolbedachtem mut vnd gutem rät mit vnsern nägsten vnd pesten frewnt gunst vnd gutem willen
do wir daz mit recht getun mochten recht vnd redleich verchauft vnd ze chäuffen geben haben den Erwirdigen geistleichn herrn dem abt vnd couent
vnser frawen gotzhaws ze chöttweyg in ir abtay do selbn vnsers rechten aigens ain gancz lehen gelegen ze wölffrumn daz zu veld vnd zu dorf
endway getailt ist vnd do auf ainn tail wämd zu weisn auf gesezzen ist hainreich der hay vnd dint alle iär sehs schilling wienn(er)
pfenning an sand micheltag vnd auf dem andn tail ist gesezzen peter der vngerl vnd dint auch alle iär sehs schilling wienn(er)
pfenning an sand micheltag vnd ain hofstat dew gelegen ist pey dem vorgen(anten) lehen vnd do auch yeczund auf gesezzen ist chunrat der
zäch vnd dint alle iär achczehen pfenning auch an sand micheltag daz selb vnser vorgen(ant) lehen vnd auch dy obgen(ant) hofstat habn
wir ledichleich vnd vnuerchumbt mit dem obgenantn dinst vnd mit alln den eren rechten nuczen als wir daz vnuersprochnleich her
pracht vnd inn gehäbt haben de vorgen(anten) geistleichn herren verchauft vnd gegebn vmb siben vnd zwainzik phunt wienn(er) pfenning
der wir von in gar vnd gancz gericht vnd gewert sein sy schulln vnd mugen auch mit dem vorgen(anten) dinst auf dem lehen lehe
vnd hofstat furbaz alln irn frum vnd nucz schaffen verseczen verchäuffen vnd geben wem sew wellen an alln chrieg vnd irrung
vnd des sey wir ir rechter schirm vnd gwer mit recht fur all ansprach vnd chrieg als aigens recht ist in österreych stund in
furbaz dar vmb mit recht icht ansprach oder chrieg auf von wem daz wär wölhen schaden sy des nemen wie so der genant ist
den selbn schaden chrieg vnd ansprach schulln wir in gänczleich vnd gar ausrichtn ablegen vnd wider chern des schulln sew habn
auf vns vnd vnsn erben vnd auf allm vnsm gut daz wir haben in dem land ze österreych oder wo wir daz haben stätt vnd
vnuerrucht wo sew daz an vns suchent oder vnsn erben sy schulln sy alle irer recht auf erlengt vnd geczalt habn wir sein chünftig
oder tod des lub wir in alles stät zehaben mit vnsern trewn an gever vnd dar vmb ze einem wärem vesten vrchund vnd zeug
des chäufs vnd der handlung so gebn wir den vorgen(anten) geistleichn herrn den prief besiglten mit vnsm aigen anhangundn Insigl
vnd mit vnsn vetern volchleins von tewrn anhangundn insigl der mit sampt vns schirm vnd gewer ist des vorgen(anten) lehen vnd
hofstat wir habn auch gepetn dy erbn lewtn den dructsäczen vnd hansen den frel von dietmärstorff daz sy auch ir aign
gezeug sind mit irn anhangundn Insigln in selbn an schaden der prief ist gegebn nach christi gepurd dreyczehenhundert iär
vnd in dem vir vnd achczigsten iär an vnser frawen abent als sy geporn ist