Ich Hilteprant von pfeingen. Igeh. vnd tůn chunt. allen den. die disen pief. sehent. oder horent lesen. daz ich mit gůtem willen. vnd mit gůten sinnen. vnd mit
gůt betrahtnůsse. die weil ich reiten. vnd gen mohte. fur mich. vnd fur mein erben. dem Gotzhaus ze wilten vnd den h(er)ren. da selbn. durch got vnd durch
mein sel willen. ze hilf. vnd ze trost. allen meinen vodern. vnd allen meinen nach chomen. geschaft. vnd gegebn han. div gůt. div hie nach geschribn sint. zev erst mein
gůt ze Gams. daz der pranch pawet. daz giltet zwai vnd zwainzich phunt p(fe)n(ning). da nach mein gůt ze Gams. daz Zeyber von prunvegn pawet. daz giltet fumfzehen
phunt p(fe)n(ning). da nach mein gůt. in Gvday. in dem Livnt. daz geit sehzehn phunt p(fe)n(ning). iaerichlich. vnd ein gelt oles. ainen afftern. zwo schultern. ein strentz waitze. da nach
mein gůt. ab dem Ellenpogen. datz prunvegn. daz geit driv phunt. fur geding. vnd fur petros. ein halb gelt oles. ein mutt hab(e)rn. vierzehn strentz robben. zwelf
strentz Gersten. vnd ainen afftern. zwo schultern. vnd ander gewonleich weisod. da nach div mvl ze Igls. div giltet. fumf vnd dreizzich strentz. muzz chorn. robb(en). vnd
gersten. da nach mein wismat. pei dem vlise ze Igls. vnd han div vorgenanten gůt. dem vorgenantem Gotzhaus. gegebn. besůchtz. vnd vnbesůchtz. fur ein ledigez gůt. mit sgetan(er)
beschaidenhait. daz man von dem chorn. daz da vor geschribn stet. zwo iarzeit begen sol. meins seligen vater. vnd div meine. als si dann gevallent. zev ietwed(er)m mal dreizzich
strentz. vnd der vor geschribn phenning. zev ietwed(er) iarzeit. sullen si gebn. sibenzehn phunt p(fe)n(ning). vmb chaes. ze d(er) zeit armen levten. vnd zev ietweder iarzeit. sulln si sagen dem spital
ze Inspruk. daz ez da sei. da man daz chorn ze wilten. melt. pachet. vnd mit den chaesen tailt. vnd ob icht vber wirt. daz sol man tailen halbez in daz spital ze wilten. daz
and(er) in daz spital gen Inspruk. vnd die selbn iarzeit sulln si begen. also. daz si ainen teppich legen sulln. ob meinem grab. vnd vier chertzen sulln da prinnen. vnd sol man
vns daz gebet sprechn. daz da haizzet enphahnu(n)sse der sel. vnd an dem abent. schon vigilie singen. d(er) Conuent gemainchlich. ze trost. vns(er) sel. an dem morgens. sol
masse singen. ze Gagenwrt. alles Conuentes. vnd d(er) priester. die auch alle messe sulln sprechen. vns(er) sel. ze hilf. vnd ze trost. da nach sol gemainchlich d(er) Conuent. vber
vns(er) grab gen. mit dem gesang. daz die seln an gehort. in d(er) sam(en). sullen die chertzen prinnen. fvnsich. als zev d(er) vigilie. nv auch daz man ietwed(er)m spital. od(er) ietwed(er)m
paid niht engeeb. swelhes iars daz geschech. so sol der dienst. daz selb iar. daz spital ze Inspruk. an gevallen. Ez sol auch daz vod(er) gůt. von dem vorgenant(en) pranchen
dem in besunder phlegt. vnd sullen die h(er)ren. von den zwai vnd zwainzich phunden. gelts. zev ietwed(er) iarzeit. d(er) selbn phennig. sehs phunt habn. da von si ir mall
pezzern. div vberigen zehen phunt. sulln si habn. von ein(er) masse. die si durtz iar. vmbtund in der woche. auf sand andres alt(er). in d(er) pharrchirch. ewiclich sprechn sulln.
nv auch. des got niht enwelle. ob dehains iars ein gemain(er) prest. daz lant. seet. od(er) an gieng. der selbn iars sint si niht gepunden dehain(er) spend. vnd nv auch daz
daz mein erbn. daz gotzhaus. an dem vorgenanten gůten. mit dehainen sachen irren. vnd beschaiden wolten. den selbn schaden sullen si habn. auf allem dem
vnd ich sitze. Daz daz also staet. vnd vnzerprochn beleib. gib ich in disen pief. versigelt. mit meins h(er)ren. chvnich hainr(ichs). Insigel. vnd mit meinem Insigel.
Daz ist geschehn. do nach crists gepurt. warn. drevzehn hund(er)t Iar. da nach in dem driv vnd zwainzigistem iar. an vns(er)s vrawn tag. als si geborn wart.