Wir karl von gots gnaden Romischer keiser czu allen czeiten des Richs vnd kung
czu Beheim enbieten dem Burgmeist(er) dem Rat vnd den Burg(er)n gemeinlich der Stat
czu sant Gallen vnsern vnd des heilgen Richs lieben getruwen vnser hulde vnd alles gut lieben
getruwen wan wir mit Rate der fursten Grauen vnd herren des heilgen Richs mit
wolbedachtem mute vnd mit rehte wizzen den hochgeborn(en) Wenczela hertzogen czu
lucemburg czu Brabant vnd czu lymburg vnsern lieben bruder vnsern vnd des heilgen
Richs gemeinen stutwer gemacht haben in dutschen landen vnd in allen and(er)n landen
vnd stetten die disset des lampartischen gebirges gelegen sind vnd haben yme gancz
macht gegebn cze tun vnd cze schaffen alles daz wir selb(e)n getun mochten als in vnsern
briefen sulche vnser meynung volkumelich vnd genczlicher begriffen ist Da von ge
bieten wir uch allen ernstlichen vnd vesticlichen by vnsern vnd des Richs hulden
vnd manen uch der eyde vnd der getruwen truwe da mit ir vns vnd dem heilgen Riche
verbunden sit das ir den egen(anten) vnsern lieben bruder vnd stutwer oder wen er daz
mit sinen briefen kuntlichen enphelhet mit all(er) e(r)b(er) macht muczen gulten herschaf
ten sturen vnd allen and(er)n sachen die vns vnd daz Riche angehoren wie man die mit
sunderlichen worten genennen mag gehorsam vndertanig vnd wartende sit glicher
weiz als vns selb(e)n an alle widderred vnd an alles wider sprechen Gebn czu Nurenberg
vnder vnser keiserlichen maiestat Ingesigel an der heilgen cwelffbotten abend Symonis
vnd Jude vnser(er) R(i)che in dem eyn vnd czwenczigisten vnd des keisertums in d(em) zwelffte(n) Jare