Nouerint vniuersi presentes litteras inspecturi, Qualiter magnificus et potens dominus dominus Jacobinus de Carraria, per Illustrem
principem et dominum dominum Karolum dei gratia Romanorum Regem semper Augustum, et Boemie Regem, Ciuitatis padue, et districtus
Vicarius generalis, Et Venerabilis pater domnus Nicolaus, Abbas Monasterij Beate sancte Justine de padua, Ad
requisitionem et mandatum, Illustrissimi domini Romanorum Regis, petentis habere, de reliquijs et sanctuarijs corporis beati sancti
Luce euangeliste, quod est in dicto Monasterio, in Ecclesia ipsius Monasterij, in vno Monumento marmoreo, super quo est Altare
dicti beati sancti Luce, Omni reuerentia et deuotione, qua melius et cautius potuerunt, cum Magistris et Instrumentis, ad lapidem
qui tegit dictum Monumentum eleuandum necessarijs, dictum lapidem fecerunt tantum in altum eleuari, quod dictus dominus Abbas potuit
tangere et videre vna cum dicto domino Jacobino, et testibus infrascriptis totum illud quod erat, in dicto Monumento, in quo quidem
Monumento erat, vna cassa plumbea, longa quasi per totum Monumentum, quam cassam dictus dominus Abbas, iuuatus a dicto
domino Jacobino, et testibus infrascriptis, apperuit, in qua cassa ossa, et reliquie dicti beati sancti Luce stabant, Et tunc dictus dominus
Abbas, capud cum Maxillis suis, et quindecim dentibus fixis in eis, de dicta cassa recepit, et tunc dictum capud et Maxillas
sub sigillo dicti domini Jacobini, Idem dominus Jacobinus et Abbas Illustrissimo miserunt, et portari fecerunt, per Reuerendum dominum
Bosonem, priorem Potumoricensem, et me Bernardum notarium infrascriptum, ad prefatum dominum Regem, Quod capud
cum Maxillis et dentibus, Jdem dominus Boso, et ego Bernardus, sub dicto sigillo presentauimus pro parte dicti domini
Jacobini, et Abbatis, prout habuimus in mandatis, Exepta fuerunt ista reliquie siue sanctuaria de dicto Monumento per
dictos dominum Jacobinum, et dominum Bosonem priorem Illustrissimum, Altobono de Buccianijs de padua, et me Bernardo de Castellis
notario, sub Anno Natiuitatis domini Millesimo Trecentesimo quinquagesimo quarto, Jndictione septima, Has autem litteras in euidens
testimonium, suprascripti domini Jacobinus et Abbas fecerunt sigillis proprijs communiri pendentibus.
Ego Bernardus olim Marchi de Castellis de Aretio Jmperiali auctoritate notarius supradictis omnibus presens fui, et propria manu scripsi
meum signum consuetum apposui, supradictis que omnia suprascripta fuerunt Anno et Jndictione supradictis die nona Mensis Nouembris.