Wir niclas stenczel vnd aw des selben niclas vetter bede burger czum newen hawse bekennen offenlich vnd tun kunt mit diesem brieffe alle
den die in an sehen oder horen lesen das wir vnd vns(er) erben schuldig sein vnd gelten sullen von rechter schult wegen dem erbern manne
heinrich wandrer burger czu nurenberg vnd sein erben Achtczig schok gross prager phennige vnd munze vnd geloben mit diesem brieffe
an alles geuerde vnd bey guten treuwen mit gesampter hant also das sich vnder vns cheiner von dem andern an dem gelobde ge
sundern oder geteilen muge die vorgenanten Achtczig schok gross dem egenanten heinrich vnd sein erben gelten geben vnd bezalen
uff das heiligtum das aller schriest chomende vnd uolgende ist an allen vorzog vnd widerrede teten wir des nicht denne allen den
schaden den der egenante heinrich oder seine erben von nicht bezalunge wegen des egenanten geldes nemen wurden es were an bo
ten lone an nachreisen an czerunge an kauffen an vorkauffen an wechsseln an kostgelde oder wie der schade mit sunderlichen worte
benant mochte werden den schaden der selbe heinrich oder seine erben sprechen mit iren slechten worten an eide vnd an alle andere
beweisunge den selben schaden alczumal mit sampt dem egenanten hauptgelde sullen wir vnd vns(er) erben in auffrichten gancz vn
gar an alles geuerde vnd wer diesen brieff haben wirt mit gutem willen des egenanten heinrichs der selbe sal haben alle die recht
die vorgeschrieben steen des czu einem geczeuknuss so haben wir bede vnser sigele an diesen brieff gehangen der geben ist czu prage do
man zalte nach cristi gepurd dreiczenhundert iar vnd darnach in dem sibenvndsibenczigsten iare am nehesten mitwochen noch sand
franciscen tage des heiligen beichtigers :-