Ich Barbara etwann des Pessehel leuthmeriger tochter dem got gnade Burgeryne der grossern stat zu prage Beke
ne offenlich vnd tun kunt mit disem briefe allen den die yn sehen horen oder lesen Also als der bescheiden man An
dres lobel burger zu prage mein stiefuater vnd Anna mein liebe muter mir vnd meine geswistreden Johani Petro
paulo vnd Cunrad fur vnsern rechten erbeteil schuldig sein dreyhundert vnd dreysig schok grosser prag(er) phen
nige als ein brieff dar vber ist Also habe ich vorgenante Barbara von den obgenanten Andres vnd Anna enpha
gen vnd eingenome mit bereitem gelde Sechzig vnd Sechsthalbes schok gross(er) prag(er) phennige an dem eyenan
briefe fur mein erbeteil dar an mir wol genůget Vnd gelobe mit disem briefe bey guten treuwe an alles geu
de fur mich mein erben vnd nachkomen das ich furbas mer ewichlichen nymer sal noch enmag die vorgenanten
Andres vnd Anna ire erbn vnd nachkomen vmb die obgenante Sechzig vnd Sechsthalb schok gross(er) die ich also
an dem vorgenante briefe fur mein rechten erbeteil enphangen habe noch vmb cheyne ley ander gut das der
obgenante Pessehel mein vater nach seinem tode gelassen hat in geistlichem oder wertlichem gerichte hofge
richte lantgerichte statgerichte noch in cheynerleye and(er)n weise mit hulfe fursten oder herren heymelich noch
offembar ansprechen anredn oder sie dar vmb muhen in cheyner weise Sunder in meime meiner erben vnd nach
komen willen vnd namen lasse ich die oftgenante Andres vnd Anna ire erben vnd nachkomen schon der egena
ten sache wegen quit entrichten ledig vnd los des zu einem gezeugniss so haben die erbn manne werteyn
etwann des lobel rotlewe sen stiefuater Leynhard von grůnhusen vnd Cunczel dibisch gesworne burg(er) vnd
Schepfen der egenante stat zu prage ire sigele durch meiner bete willen an diesen brieff gehangen der ge
ben ist zu prage do man zalte nach Cristi gepurd dreyczenhundert Jar vnd dar nach in dem Acht vnd Achtzi
gisten Jare an dem nehesten freytag nach send Jůrgen tag des heiligen mertirer