Ich Peter von Rosenberch Oberister cham(er)er des chunigreichs in pehem lann offen und
zaigich an disem brief und tůn chunt allen den di in sehent oder horent lesen daz ich gesatzt
han zwai dorfer daz ze chrinne und ze dem Nicoles mit allem dem und dar zü gehort ze holtz
und ze veld versůcht und unversůcht redelich und recht als ichs gehabt han dem erben und
dem getruven riter hern Bohunken von harach fur dri dru achtzik March lotigs silbers immer
vier und sechzik grozzer prager pfenning fur ein March Auf den vaschank der schirist chumt
so schol ich mein gůt losen tůt ich des nicht so schol iz im anet sten ein jar und schol alle
rechtlich losung sein ze uschlag und mer ich schol auch des gůts und des satzs sein herre
und sein gewer sein vogt und sein schirmer sein also lants recht ist geschich aber daz des
got nicht engab daz wir baid sturben ich und her Bohunk e daz daz vorgenant gůt gelost
wurd so schullen meiner chint seiner chinde vogt und schirmer sein als lang unz iz gelost
wirt Und daz im daz stet und unuerchert belib dar uber gib ich im disen offen brief zeiner
urchund mit meinem hangunden Insigel wol versigelt und bester der red sint zeug her Bonizlab
von Malabuz her diche von Bucinabuz her purichart her alber von harach her witzk von
Lauku dietrich und sein bruder witzk von harach Jacob von harach Vlreich von Rumen und
ander erber leut gnuoch di der red zeug sint Der brief ist geben nach christes geburt Tausent
Jar dreu hundart Jar dar nach in dem funft und zwantziksten jar an sant thomas tag