Ich paul(us) v(n)d Ich wenichs v(n)d Ich vnsart v(n)d Ich wochink v(n)d ander vnser pruder h(er)n wochinks
chinder von harach vergiehe(n) vns ain chunt offenbar an disem p(r)ief Alle den di in lesent sechent
oder ho(e)rent lesen di nu lebent oder her nach chumftig sind daz wir mit wol bdacht(e)r mu(e)t
v(n)d mit gu(e)tem willen v(n)d auch mit vnser(n) pesten vreu(n)t rat vor pidern lewten gegeben
haben der erbn sampnu(n)g gemain dez chlosters ze hoh(e)nfurt drew phunt geltz all Iar ewichleich
vnsers vater sel h(er)n wochinks von harach v(n)d vnser paider mu(e)ter sel den allen got genad zv
einem rechte(n) v(n)d ewigen selgeret Also daz wir dev vorgeset(e)n drew phunt geltz alle Iar selb
bra(e)chte(n) v(n)d gebe(n) scholle(n) zv den drein tagen als vnser vater v(n)d vnser paid mu(e)ter schaiden sind
dez nesten mentag in der ersten vastwoche(n) ein phunt an sand dominchen tag ein phunt v(n)d an
sand Nyclas tag ein phunt Also ausgenomenchleich daz man von den selbe(n) drein phunte(n) geltz in dem
egenant(e)n chlostere ze hoh(e)nfurt schol begen alle Iar ewichleich ir aller dreir Iar tag einem igleichem
an seine(n) tag als sev gschaiden sind mit ganzer andacht v(n)d mit eine(n) mal der sampnu(n)g gemain
in daz reuent als ir gewonhait ist Alsobeschaidenleiche(n) wa(e)n daz ist daz wir dev vorgenante(n)
sampnu(n)g ze hoh(e)nfurt lo(e)se(n)t dreissig phunt pheni(n)g so scholl wir der dreu phunt geltz ledig sein
gantz v(n)d gar v(n)d schol auch di vorgenant sampnu(n)g ze hoh(e)nfurt dev selbe(n) dreissig phunt anlege(n)
nach vnserm rat Also daz si da von bege(n) scholle(n) ewichleich vnsers vater v(n)d vnser paider
mu(e)ter Iar tag als vor geset(e)n stet Daz dev red all stet v(n)d gantz v(n)d vnzerproche(n) beleib an
alle chrieg ewichleich daru(m)b geb wir der oft genant(e)n sampnu(n)g ze hoh(e)nfurt disen p(r)ief wol vsigel(e)t(e)n
mit vnsers pruder pauleins Infigel v(n)d mit vnsers genedig(e)n h(er)ren h(er)n pet(e)rs von rosenb(er)g
Infigel diser p(r)ief ist gegebe(n) do von christes gepurt ergang(e)n warn drevzehnhu(n)dert Iar
dar nach in dem Nevn v(n)d dreissigstem Iar dez erichtag i(n) der ersten vastwoche(n)