Ich mychls vlreichs sun von gutem wasser dem got genad. Vergich vnd tun chunt offenbar an
dem prif allen den di in sechent. lesent oder horent lesen. daz der erber cuent des
chlosters ze hohnfurt. mir gelihen hat auf meinen halben hof den ich han dacz dem gutem
wasser. achtzik. vnd drev phunt passawer phennig. Alsobeschaidenleich. daz si den cins daz iar
achtzik phennig dienst. an sand georgen tag virczik. vnd an sand mychels tag virczik in nemen
schullen. vnd wer daz. daz ich in di egenanten achtzik vnd drev phunt phennig vor
sand mychels tag virczehen tag wider chert. so ist mein vorgenanter halber hof wider
mein als ee. Tvt ich des nicht so schullen si in dann furbas inn haben in alle dem nucz
vnd gewer als ich in vnd mein vordern inn gehabt haben. an allen chrig. an aller wider
redd vnd an aller ansprach ewichleich. Daz di redd stet gancz vnd vnczeprachen beleib
darum gib ich in den prif. besigelten mit hrn ludweiges purgrauens Insigels ze rosenberch
wand ich aigens Insigels nicht het. der mit samt dem qualn von churschlag vmb di sach mein
purgel warden ist. vnd ein warr gezeug mit andern pidern leuten. Der prif ist gegeben
do von christus gepurd ergangen warden. drevczechenhundert Iar. dar nach in dem fumfczigistem
Iar an des heiligen herren sand lamprecht tag :~