Forschungskatalog

Urkunden erkunden

Beginnen Sie mit einer einfachen Suche. Verfeinern Sie erst, wenn die Forschungsfrage es erfordert.

1563_XI_02

CZ-KAVB > VYBRO > 1563_XI_02

Quelle: MonasteriumKI-PaläografieKI-Interpretation
Seite 1 / 2
1563_XI_02, Seite 1
Ansicht
Transkriptiongemini-3.1-pro-preview
Ich Johann abt des Gotzhaws Hohenfurt Bekhenn hiemit offennlich mit disem Brieff fur den hiekhumbt oder gelesen
wirt, das fur mich khumen ist Hanns Leupolt von Kaltnpruen, anzaigent, wie ime seiner eheligen geburt unnd herkhumen
ein weisung unnd gnugsame darthuung vonnötten were, mich derhalben diemutiglich peten, ime derselben warhafftige
unnd gruntliche zeugnus unnd kuntschafft mitzutailen unnd zufolgen lassen, auch daneben fur mich gepracht, die Erbarn
unnd glaubwirdigen mit namen, Wolffgang Schilher, Albrecht Schneider unnd Hanns Prainfalt, alle drey zu Kaltnpruen
gesessen, mit pitten seiner eheligen geburt, bey inen gruntlichen zuerkunden unnd erfragen, welche ich dann ainen ieden
in sonnderhait bey seinem aydt unnd gewissen erinern unnd befragen, mir deshalben ein warhafftigen grundt unnd bericht
zugabenn unnd darzuthun, Darauff dann ein ieder in sonnderhait, mermals unnd samentlich, hernach offentlich bekhant unnd
bezeugt, wie sie noch in frischer unnd gueter gedechtnus habenn, das Urban Leupolt hueber unnd sein haussfraw Agatga, baide
von Kaltnpruen, zu Hohenfurt als in irer gewonlichen pfarr unnd kirchen, nach Christlichem geprauch unnd gewonhait, zu
kirchenn unnd gassen geganngen, auch alda von dem Priester nach aufsezung unnd ordnung Christlicher kirchen, verhelicht
unnd vermechlet sein worden, Nachmals auch durch solche Christliche vermahelung unnd ehelige beivonung, genantenn Hannsen
Leupolt inen baiden erzeugt unnd uberkhumen, Solches alles habenn obgenante Personen, als Wolffgang Schilher, Albrecht Schnei
der unnd Hanns Prainfalt, bey irem aydt unnd gewissen vor mir dergestalt unnd bekennet, Dieweill dan ich ime Hannsen
Leupolt solch sein Rechtmessig unnd gepurliche begern, zu befurderung der warhait nit abschlagen künden, unnd demselbenn
zuhelffenn gepurlich erachtenn, Gib ich ime hiemit gegen ieden unnd menigklichen, solcher seiner eheligen geburt, unnd
Redlichen herkhumen, ein offentlich zeugnus unnd kuntschafft, Des auch zu merer urkhund hab ich ime disen geburts
brieff mit meinem gewonlichen anhangenden Sigill verfertiget unnd dargeben, Datum Hohenfurt an aller glaubigen
Seelen tag, als man zelt Tausent funffhundert unnd dreyunndsechtzig Jar.

Wissenschaftliche Transkriptionszeichen

(text)
Aufgelöste Abkürzung; die Buchstaben in Klammern wurden ergänzt.
~text~
Geringe Unsicherheit.
|text|
Erhebliche Unsicherheit.
¦text¦
Sehr unsichere Lesung.
<text>
Kontextuelle Rekonstruktion, die nicht sicher sichtbar ist.
# / #3w
Sichtbare, aber unlesbare Schrift.
^3w^ / ^2l^
Physisch fehlende oder beschädigte Passage.