Wir Karl von gots gnaden Romischer kunig ze allen zeiten merer dez Reichs vnd kunig ze Beheim bekennen vnd tun kund offenlichen
mit disem brif daz wir den andechtigen geistlichen leuten dem General priualte priorn vnd allen brudern gemeinlichin sand Augusti
nus orden ze teutschen landen vnsern lieben andechtigen die genad die in der stul von Rome vnd besunderlich pabst Alexander der virde getan
hat also das sie Erbe vnd aigen varent vnd ligent gut swie die genant sind haben niezen nemen vnd vordern sullen vnd mugen als
sie dorubir desselben pabstes gebulliert offen brif habent die wir verhort vnd gesehen haben von vnserm Romischen kuniglichem gewalt
vnd besundern genaden vnd gunst die wir zu den selbm orden tragen bestetigt haben vnd bestetigen ouch mit disem gegenwurtigen brife
vnd dorumb gebieten wir allen vnsern vnd dez Reichs getrewen fursten Greuen fryen dinstmannen leutn knechten Edeln vnd
vnedeln sie sein uf dem lande oder in steten gesezen vesteklichen vnd ernstlichin daz sie die vorgenanten bruder sand Augustins orden
an disen genaden nicht hindern noch irren mit dheinen sachen besunder wellen wir das sie dieselben bruder von vnser vnd dez Reichs
wegen schirmen vnd in geraten vnd geholfin sein wider alle die die si an disen gnaden bekrenken wolten als sie vnser vnd dez Reichs
swer vngenade vermeiden wellen vnd dez tzu einem vrkunt habn wir in disen brif geben versigelten mit vnsm kuniglichen Insigel der
geben ist zu Nurenberg do man zalt von Cristes geburt dreutzehenhundert vnd in dem vir vnd funfzigstem Jare an dem nechsten
mitwochen nach dem heiligen pfingstag In dem achten Jar vnsers Reichs.