Wir Procop von gotes gnaden Margraue czu Merhern bekennen vnd thun kunt offenlich mit desm briefe alze wir mit vnsm
lieben bruder Ern Joste genczlich gesunet vnd czu frunde gemacht sint daz mit vnsm wizzen vnd willen getedinget vnd ubirredt
ist durch vnse frunde vnd helfer dass dy sammt hie by vns vff desem tage czu prage nicht geinwertig sint also daz wir von desem
hutigen tage bynnen acht tagen dy nest nacheinandir volgen alle vnse slos vnd vnse helfer in polan vnd in Merhern vnd her=
czogen Swantebur von Stettyn durch des willen daz er vns verne gesezzen ist von desem hutigen tage bynnen virczen tagen die
nehest nacheinandir volgen besenden vnd yn dese sune vnd fruntschaft kündign suln vnd czu wizzen thun daz sye ouch die von den
Sloßen In polan vnd in Merhern nach desen acht tagen vnd der herczoge von Stettyn nach desen virczen tagen furbas nicht schadn
thun vnd swaz sich In desen nehesten acht tagen von den Sloßen In polan ader In Merhern dy vns ader vnse helfer sint ader von
dem herczogn von Stettyn eynt bynnen virczen tagen dy nehest nacheinandir volgen nach gebunge dis brieffes wedir vnsern
bruder ader dy syne vorlisse ader geschee darumb sullen wir vnd die vnßn von vnsm bruder vorgnt vnd synen helfern vnuor=
dacht syn vnd vnbetedraget bleyben swaz abir nach desen acht tagen alze vor geschriben stet von vns ader vnse helfer Sloßen In polan
ader In Merhern ader von dem herczogen von Stettyn vorgnt nach desen virczen tagen alze vorgnt ist von deses kriges wegen den wir
mit vnsm bruder gehabt habin vnsm bruder ader den synen schade geschee den sullen wir ym vnd den synen wedir richten vnd
keren ane wedirrede nach geheiße vnd yrkentnisse vnse liebn sweger Margrauen wilhelms czu miszen ~rc~ vnd Ern ffridrich burggrauen
czu Nurenberg welche abir vns helfer sammt mit vns hie czu prage sint dy sullen deser sune von stundan mit vns gebruchen
vnd dy sune halten ane arg vnd In alles globe wir ouch vnsm lieben bruder Margrauen Joste ane geuerde by guten truwen
gancz stete vnd veste czuhalten were ouch sache da got vor sye daz Margraue wilhelm von miszen ader burggraue ffridrich von Nuren=
berg vnsr guten vnse lieben sweger von ehaftir not ader sy daz czuqueme vns vorsumeten vnd czwisschen vnsm bruder vnd
vns nicht vßsprechen czwisschen hie vnd Ostirn dy schirst komen so sullen wir furbas der beredunge vnd berichtunge vnß bruder
vnd wir beydirsit ledig vnd loz sin vnd dy briefe dye darubir gemacht sint dy wir vnsm bruder gegeben habm vnd er vns
wedir gegeben hat dy vnse sweger von miszen vnd von Nurenberg oft genant czwisschen vnsm bruder vnd vns getedinget habm
sullen furbas ymmer craft noch macht habm des czu orkunde haben wir vns Ingesigel wizzentlich an desen brieff hangen hengen
der gegeben ist czu prage nach gotes geburt dryczehnhundirt Jar darnach in dem vyr vnd nuczigsten Jare am nehesten Sunabunde
nach Sente dorotheen tage der heyligen Juncfrawen .