Fridreich von gots gnaden Romischer kunig zu allen zeiten
merer des Reichs Herczog zu Osterreich und zu Steir (et)c(etera)
Ebern weisen besunder lieben Als ir dem Edeln unserm lieben getrewen Wenczlaen dem Rozmiger von
Rozmig icz hab(e)t geschrib(e)n von des von der leyppen und ettlicher annder sachen wegen der hat das als an uns bracht
dabei wir ewren guten willen zu frid und gemach wol versteen und was wir auch darzu gedienen und ew gnad
und furderung beweisen mugen des sein wir willig und uns zweyuelt nicht ir habet wol vernomen und in
menigern wegen verstanden daz wir zu besridung beder lannd Osterreich und merh(e)rn wol genaigt sein und wie
sich der von der leyppen vormals und auch Jorg und Zamel von bettaw habent verschriben ob si zu iemand
im lannd ze osterreich hieten zusprechen daz si das mit Recht zu in suchen und Recht nemen und geb(e)n wolt(e)n
an billichen stet(e)n daruber si nu aber angriff im lannd ze osterreich tunt wiewol wir uns gewilligt hett(e)n
die unsern mit volliger macht zu ainem tag durch berurtt willen meniger sachen die daselbs furbracht w(er)d(e)n
worden gen Znaim ze schicken die nu auch an irem gemerck(e)n nind(er)s dahin kōmen wem si futer und
gemugsam gelait ab und zu ze chomen hieten gehaben mugen wie nu darumb sei mugt ir wol versteen
daz uns und den unsern in die lenng swer und unfugsam wer solich gross schaden und und unser lannd
und lewte so uns und den unsern aus dem lannd ze merh(e)rn enczog(e)n werden zeleiden und musten ge=
dennkhen solichen angriffen und mutwillen ze wid(er)steen Daran begern wir an ew(er) daz ir sy
underweiset als weis ir mugt daz si uns und die unsern solicher angriff und mutwillens so si unbillich
tunt und merh(e)rn habent vertragen und den den si ir gut habent genomen darumb widerkerung tun und
ob si zu iemand hie im lannd icht hieten ze sprechen daz si das tun mit Recht an billichen stet(e)n als si sich
des vor habent v(er)schriben und billich ist wan wir bestellen und drinn sein wellen daz in umb solich ir
spruch furderlich Recht widergeen sol Daran tut ir uns ain gut geuallen Geben ze wienn an sannd
Elizabethen tag Anno domini (et)c(etera) quadragesimoquinto Unsers Reichs im funfften Jare
Comiss(io) domini
Regis in consilio