Ich Karel von wlasym dy czeit vnterkemerer zu merhern Beken mit dießem Offenbriff vor alliklichin gegenwrtigen vnd
zukunfftigen das ich von den Erbern vnd weyßen mannen dem Purgermeister vnd von dem Rat der Stat Znaym von der
hailigen Sant Elyzabeth tag Noch Cristgepurd Virczehnhundert Jar vnd der noch in dem Newnundffumczigsten Jare auff Sant
Katerintag Noch Cristi gepurd virczehenhundert vnd der noch in dem Sechczigsten Jar dor ir ampt gebert hat Ich abgenanter
Karel hab eyn gancze vnd volkume raytung von yn auffgenomen Also daß all ir eyn Nemung vnd eynnemung in der Sum hat ge=
pracht Sehs hundert vnd Sibenczehenthalben Schok newn groff(en) vj d(enarios) Vnd dor enkegen hat ir außgebung gepracht Sehs=
hundert Czwanczig schok groff(en) Vnd Achtundffirczig groff(en) dray phening deß das vbrig ist die alt geltschuld alle die czeit zoßie
bey dem Schophumpt sint gebesen da bey sie auch der Stat die alt vnd new Schuld haben gemalt die aygentlich in iren
Registern begriffen vnd vormerkt sind Dorumb der vorgenanten raitung zoßie getan habint volkilich doran mich auch volgenugt
Sag ich abgenanter Karel Als mir der Allerdurchleuchtigist furst vnd herre her Jery von gotes gnaden kung in behm
vnd Margroff zu merhern ir mein gnedigister lieber herre befolhen hat vnd von meines Camermeistertumbs ampt Sag ich
die bemelten Purgermeister vnd den Rath gancz vnd gar Qwitt ledig vnd laß mit vrkund deß brieffes besigelt mit
meinem auffgedrukten peczet Gegeben zu Znaym an dem selben Sant Katerintag Noch Cristi gepurd Virczehen=
hundert vnd in dem Sechczigsten Jar