Wir Friderich von gotes gnaden Romischer kunig zu allentzeiten merer des Reichs Herczog ze Osterreich ze
Steir ze Kernden und ze Krain Graf ze Tirol (et)c(etera) Entbieten allen fursten gaistlichen und weltlichen Grafn
Freyen herrn Rittern und knechten haubtleuten lanntuogten Vitzumen phlegern purkgrafen Vogten lanntrichtern
Richtern Burgermaistern Reten Burgern mauttern Zollnern und allen andern in welher wirdichait stannd und wesen
die sind den dir brief gezaigt wirdet unsr gnad und alles gut Eruirdigen hochgebornen Edln und lieben getrewn
Wir lassen ew wissen das sich unser getrewer Barthold herr walse der briefe in die Newnstat ziehn wirdet unsr Burg
daselbs ze mieden Darumb empfelhn wir ew allen und ewr yeglichem mit ernst und begern das ir denselben Bartholden
mit allem seinem hausrat und gut so er herab furet von Regenspurg untz gen der Newnstat mautfrey und an ander
irrung des selben seins ziehens und gerette auf wasser und lannde in sunderhait oder miteinande(r) varen und ziehn
lasset Daran tut ir unsrn willen Geben zu Wienn an mitwochen nach dem Sontag Jubilate Anno domini (et)c(etera)
quadragesimo Unserer Reiche im Ersten Jar Under unsrn Insigl das wir in unsrn furstentumben untz her gepraucht
haben
Ad m(an)d(a)t(um) d(omi)ni Regis