lieben getrewen. Der durchleuchtig Georg kunig zu Beheim vnd marggraff zu merhern vns(er) lieb(er) swag(er) vnd kurfurst. hat vns yecz von Buriano von lippnicz
vnd ettlicher wagenphert vnd wegen weyen. so desselben Burian furlewten. die jm als er schriben dem. die er zu wienn vnd kornnewnburg kaufft hat. zu
sein notdurfften. hat furen lassen wellen. durch ettlich vns(er) vndertan. daselbs bey kornnewnburg. genom(m)en sein sullen. geschriben So hat vns auch da..
neben derselb Burian. der obmeltn vnd annd(er) sachen vnd vordrung halben. so er zu vns seczet. vnd dabey vnsern lanndtleutn vnsers furstentumbs
osterrich. so yecz zu kornnewnburg sein geschriben. so haben auch in sunderhait matusch von sternberg Jan drawzistk von hradku waczla
von lezku. slauata von chlum Nicolaus lusizki. der bohem(isch) woywoda vnd sein capplan desselben vnsers lieben swagers des kunigs. vnderseß(en)
vnd vndertanen. den berurten vnsern lanndtleutn auch geschriben. darjn(n)e ettlich aus jn vns vnd lannd vnd lewt angriffen haben. vnd die
teglich mit rawb prannt. vnd in annd(er) wey beschedigen vber alle pilliche vrbietung. vnd an recht. So lanngt vns auch wuntlich an. wie
der benant lusizki. sich in merhern teglich vast bewerb. vnsern lannden vnd lewten zu beschedigung vnd vnrat. Darauf schreiben wir dem
benantn vns(er)m lieben swager dem kunig. das wir nicht wissen. wer dem benanten Burian. sein bemelt wagenphert. vnd weyen. genom(m)en
hat. wir haben auch jhm geuallen daran nicht. so wir aber des vnderricht werdn. durch welh die vnsern. das beschehn ist. das wir schaffen
wellen. darumb gnug zutun. vnd begern an jn. das er bey den benanten Burian. vnd annd(er)n seinen vndertanen. darob sey. das sy vns. vnd
vns(er) lannd vnd lewt. hinfur nicht angreiffen. noch beschedigen. das er auch solh besam(m)ung. so nu lanngzeit her. in dem kunigreich Beheim
vnd dem marggraftumb merh(er)n. gewert haben. vnd noch vnsern lannden vnd lewten zu beschedigung vnd vnrat beschehen. yecz vnd hinfur
nicht gestatte. sund(er) vnderslaff. vnd abstelle. damit vns auch nicht widerumb geburn werde zunem(m)en. solhs aus vnsern furstentumb(en).
vnd lannd(en). auch zugestattn. wan welh aus den obbemeltn oder annd(er)n. desselben vnsers lieben swagers vndertan(en). zu vns. od(er) den vns(er)n
spruch zuhaben mainen. sein wir willig wann wir darumb angelanngt werdn. tag zuseczen. die sach(en) zuhorn. vnd darjn(n) was pillich
vnd recht ist zuhanndln. Alß begern wir an ew mit sunderm vnd ganczem fleiß. das jr bey dem egenan(n)tn vns(er)m lieben swag(er) dem kunig
daran seit. das er schaff vnd bestell. auch ernstlich darob sey damit solh beschedigung vns(er)r lannd vnd lewt. durch sein vndertanen. hinfur.
nicht beschehn. auch solher besam(m)ung. yecz vnd kunftiglich nicht gestatt. sunder die vnderslaff vnd abstelle. dadwrch nicht weiter vnrat
daraus vnd beder lannd(en) vnd jren jnwonern aufersteen. sunder die in frid vnd gemach beleiben. Darin tut jr vns sunder gut geuallen das
wir gen ew kunftiglich mit gnad(en) erkennen well(en). Geben zu der Newnstat am freitag. vor dem suntag mis(er)icordia dom(in)i. Anno dom(in)i (etc)
lxvi. vnsers kaisertumbs im funfzehentn jare
Com(m)iss(io) d(omi)ni
Jmp(er)atoris p(ro)p(ri)a