ALEXANDER EPISCOPUS SERUUS SERUORUM DEI AD PERPETUAM REI MEMORIAM
Ad ea que circa statum ecclesiarum et Monasteriorum omnium ac personarum presertim feminei sexus in illis sub regulari obseruantia domino famulantium salubriter dirigendum tendere dinoscuntur paterna solicitudine prospicientes
hiis que ad hec prouide per sedem apostolicam concessa sunt ut eo firmius illibata persistant quo magis nostro fuerint presidio communita cum a nobis petitur libenter nostri adiungimus muniminis firmitatem Sane pro parte dilectarum
in christo filiarum Priorisse et Conuentus Monasterii per Priorissam soliti gubernari sancte Catherine Olomucen(sis) ordinis sancti Augustini sub cura fratrum predicatorum degentium nobis nuper exhibita petitio
continebat quod dudum felicis recordationis Bonifatius papa nonus predecessor noster certis suadentibus causis tunc expressis tunc et pro tempore existenti dicti Monasterii Priorisse ut cum duabus aut tribus seu
pluribus Monialibus quas ad id eligeret dictum Monasterium exire aut duas uel tres seu plures Moniales eiusdem Monasterii pro utilitate dicti Monasterii seu illius negociis promouendis uel prosequendis
aut etiam expediendis emittere diocesani loci seu Magistri Generalis dicti ordinis aut cuiusuis alterius licentia super hoc minime requisita seu obtenta libere et licite ualeret apostolica auctoritate indulsit Et deinde pie memorie
Paulus papa ii etiam predecessor noster easdem Priorisse et Conuentus personas ac locum in quo diuino erant obsequio mancipate cum omnibus bonis que tunc rationabiliter possidebant et infuturum iustis modis
prestante domino possent adipisci sub sua et beati Petri protectione suscepit omnesque libertates et immunitates a predecessoribus suis Roman(is) Pontificibus siue per priuilegia uel alia indulta eis et eorum domui
concessas necnon libertates et exemptiones secularium exactionum a Regibus et Principibus atque aliis christifidelibus Priorisse et Conuentui ac domui prefatis rationabiliter indultas specialiter autem decimas
primitias terras domos uineas ortos possessiones fructus redditus prouentus iura iurisdictiones aliaque mobilia et immobilia bona ad dictam domum legitime tunc spectantia sicut Priorissa et Conuentus prefate
ea omnia iuste et pacifice possidebant eis et per eas dicte domui salua in predictis decimis moderatione Concilii generalis eadem auctoritate confirmauit prout in singulis litteris eorundem predecessorum desuper
confectis dicitur plenius contineri Quare pro parte earundem Priorisse et Conuentus nobis fuit humiliter supplicatum ut concessionibus confirmationibus et singulis litteris predictis pro illarum subsistentia firmiori
approbare aliasque in premissis oportune prouidere de benignitate apostolica dignaremur Nos igitur Priorissam et Conuentum prefatas illarumque singulares personas a quibusuis excommunicationis suspensionis
et interdicti aliisque ecclesiasticis sententiis censuris et penis a iure uel ab homine quauis occasione uel causa latis siquibus quomodolibet innodate existunt ad effectum presentium dumtaxat consequendum
harum serie absoluentes et absolutas fore censentes huiusmodi supplicationibus inclinati concessiones confirmationes et singulas litteras predictas quatinus sunt in usu prefata auctoritate tenore
presentium approbamus ac perpetue firmitatis robur obtinere decernimus Non obstantibus Constitutionibus et ordinationibus apostolicis ac omnibus illis que prefati predecessores in litteris
predictis hic uoluerunt non obstare ceterisque contrariis quibuscunque Nulli ergo omnino hominum liceat hanc paginam nostre absolutionis approbationis et decreti infringere uel ei ausu temerario contraire
Si quis autem hoc attemptare presumpserit indignationem omnipotentis deique beatorum Petri et Pauli apostolorum eius se nouerit incursurum Dat(um) Rome apud Sanctum Petrum
Anno Incarnationis dominice Millesimoquadringentesimononagesimoquarto Quinto Kal(endas) Februarii Pontificatus nostri Anno Tertio :-