Ich Bvnaer von lompnitz Vgich des an disem brief vnd bechenn des offenleich vnd lob iz mit
meinen triwen daz ich allez daz geschaeft vnd di ordnunge di mein libeu muet(er) katrev gen
sant Annen chlost(er) getan hat vnd gen allen den vrowen di da innen got ewichleichen dienen
schullen da si in ier hantfest vb(er) gegeben hat daz ich daz fuedern wil vnd staet haben mit gantzen
triwen an alle argliste immerm(er) di weil ich leb vnd lob auch daz an disem brief mit meinen
triwen allen den vrowen di danne zden zeiten in dem vorgenanten chlost(er) lebent daz ich nach
mein(er) muet(er) tod daz erst iar von dem dorffe ze vrsichaw als si daz mier vnd meinen sunen hat
gegeben nach ierem tode wed(er) zins noch dehain(er) lay gelt nemen wil noch enschol denn ich wil
geben den vorgenanten vrowen in dem chlost(er) als si iz geschaft hat mein muet(er) Ich lob furbaz
mer daz ich Harschen den chnecht den mein lieb(er) vat(er) bevalch mein(er) muet(er) an seinem tode nimmer
gehind(er)n wil an den zwain lehen di si im gegeben hat in dem vorgenanten dorffe w(aer) ab(er) daz daz
er mier nicht fuegt zu einem dienst so wil ich im noch sein(er) housvrowen noch seinen erbn nimm(er)
genemen ich hab im od(er) seinen erbn e gegeben vier vnd zwaintzikh markch silbers Daz selbe
sullen laisten alle mein sune sturben ab(er) mein sune an erben des got nicht engeb so sol daz vor
genant dorf wider gevallen vnd ewichleich des vorgenanten chlost(er)s sein aigenchleichen imm(er)
mer mit alle dem daz dar zue gehoert Ich yentz weyln des iungen Tazen sun bechenn des auch
an disem brief vnd lob iz mit meinen triwen daz ich von den zwaintzikh lehen vnd von dreitzehen
hofsteten ze schutwaritz noch van weingarten noch van holtz dehainen zins noch nutz daz erste
iar nach mein(er) anvrowen tod nimm(er) genemen wil noch ensol iz schullen nemen di vrowen als
mein vet(er) Bvnaer vor gelobt hat vmb vrsichaw starb ab(er) ich an erbn so sol daz vorgenant
erb daz mier mein anvrow hat geschaft wid(er) gevallen dem chlost(er) vnd d(er) samenunge als iz mein
anvrow geschaft hat Disen brief hab wier ich Bvnaer von lompnitz vnd ich yentz vb(er) vns
gegeben willichleich zu ein(er) vrchunde vnd zu ein(er) gewissen getziugnusse d(er) vorgeschriben sach
Bsigelt mit vnser baid(er) insigel vnd mit and(er)r h(er)ren insigl d(er) nam h(ie) nach geschriben stet
mit h(er)n Jeschken von pezerietsch h(er)n Diwischs von sternberch h(er)n onlitschs von namieschtich
h(er)n woytechs von pedlaw h(er)n witigen von slutsch h(er)n vlreichs von Bonnb(er)ch diser
brief ist ge~be~ben do von christes gepuerd warn dreutzehen hund(er)t iar dar nach in dem
sibentzehenten iar 1317