Wir petel alt richt(er) auff der newn gassn vnd barbara sein eliche hawsfraw Mit vnsern erbien vnd nachko(m)me(n) bekenne(n) mit dissem brieff.
das wir von grosser not. dy vns darzue gedrung(en) hat. kaufelich vnd rechtlich verkaufft habn. vnd mit dir gigenburtign geschrifft
verkauffn ain j marck gr(oschen) d(enariorum) morherrischer zall vnd merung wares gewichts vnd plags Jarlichs zynns vmb v marck gr(oschen) vor=
gemelter munss vnd zall. den Erwirdign vnd gotergebn Junckfrawn Swester Magdalene Cheffrin die zeit priorin
vnd dem ganczn conuent des klosters vnser liebn frawn zw swester herberg In der stat Brunn auff vnserm haws mit
seiner zwgehorung auff der bemelttn Junckfrawn meiner genadigen herschafft grunt auff der vrbemeltn newgassn ge=
leg(en) zwischn des Michel schick auff der ain seytten gelegn vnd andri thalusch zw der andern seyttn vnd auff den
nachstn sand veits abent kunfftig anzwheben ain j marck grossen d(enariorum) vorgemelter munss vnd hinfur alle ir Jarlich alle
mal auff den bestymbtn sand veitsabent zwraich(en) vnd zw zynnssn gancz frey vnd an alle pird vns aufflegund. vnd
ob wir das nit taten (do got vor sey) So solln dan die vor bemelttn Swester Magdalena priorin vnd der gancz conuent
ganczn vnd volkomen gewalt habn. Solichn versawmbttn vnd vnbezalttn zynnss erfudern vnd ausspringn auff vnser
schadn an allen wederstandt Gaistlichs vnd weltlichs rechtn vnd so wir welln vnd vns das geluck fuegt. mug wir
den bemelttn zynnss ain j marck gr(oschen) mit. v. marck bestymbter munss vnd zall widerumb ablossen vnd abkauffen
mit sambt dem versessn zynnss Auff die zeit gepuerundt gancz bezallund dem allen zw warer vrkundt vnd zeug=
nuss habn wir gepettn die erbern vnd weyssn herrn herr paul Sneyder in der prunner gassn gsessen vnd her paul
Erl in d(er) frolichn gassn purger zw Brunn das sy ir Insigel an dissen brieff habn lassn hengen doch In vnd yren erben an
schadn Gebn zw Brunn an sand veits abent Noch cristi gepurd Tausent vierhundert vnd In dem Syben vndnewn=
czigistn Jarr