Ich Jörg Schneider in der alten Brünn Und Eua mein eheliche Hausfrawe mit vnnserm Erben vnd Nachkömen Bekennen offenlich mit
dysem brieff aller menigklich das wir aus schwerer notturfft vnns darzu zwingend auff vnser erblichen gerechtigkait dye wir auff vnserm
halben weingarten gelegen zw Brünn im hinternperg zwyschenn lenharts lodrer auff ainem vnde Rudolphen pabschs auff dem
andern tail halben darneben für vns paur sind Jörg heßler von indorff vnd Wenzla schüß in d(er) aue her verkaufft haben vnd in Krafft
dyßs brieffs verkauffen ein halbe Marck gemainer pfenning Mährischer zall vnd Müntz wares rechts vnd plosses Järlichs zinß
vmb fünff Marck Groschen pfenning obgemelter zall vnd Müntz den gaistlichen vnd gotergeben Junckfrawen mueter priorin
vnd dem ganzen Conuent des Closters zw vnser lieben frawen zw Schwester herberg in der Stat zw Brünn dye wir berait
von in empfangen haben vnd eingenomen Darumb wir in für vmb den nuz vnd geprauchung des vorgemelten gelts schuldig
vnd wellen zinsen ein halbe Mark Groschen gemainer pfenning Mährischer Müntz vnd zallung vnd anzehebn zw zinsen
auff Sand Opolonia tag nachstkünfftig vnd hinfür allweg zw zinsen an dem vorbestimbten tag Ob wir aber oder vnser Erben
vnd nachkömen do got für sey säumig erfunden würden mit dyser Järlichen bezallung So schollen dye vorgemelten wirdig
mueter priorin vnd der Conuent des vorgemelten Closters oder ir nachkömen vollen gwalt haben den versessen zinß zwersodern
durch mittel gaistlichs vnd weltlichs rechts vnd käm das wie es well so schollen sy vollen gwalt haben sölichen zinß zwerso=
dern auff all vnser hab vnnd guet dye wir yezund besizen vnd hyen nach besizen werden wir oder vnser Erben vnd nachköme
Aber wir mügen künnen vnd wir wellen vnd vermüglich werden obgemelten Tzinß ein halbe Mark groschen mit fünff Marck
Groschen pfenning als oben berüert ist widerkauffen doch den zinß zw seiner zeit vormalls ganz vnd gar zubezallen trewlichn
vnd ungeuerlichen Des zw warer zeugnüß hat der Ersam weyß Herr Hainrich kayss dyezeit des alten Rats der Stat
Brünn vnd fogtherr des Closters zw vnser lieben frawen obgemelt von wegen vnsers vleissigen gepets sein Sigel an dyßn
Brieff angehangen Im vnd seinen Erben vnd nachkömen an schaden Geben am Montag an Sand Opolonia tag Nach
Cristi Gepurdt Tausentfünffhundert vnd darnach Jm Sechsten Jaren