In nomine domini Amen. Wir Swester Katherina Priorin, Ursula Suppriorin, Cordula Schafferin vnnd das gancz Conuendt Sand Katheryn zw Olomucz des ordens
Sandt Augustin vnter der befelnuß vnnd besiczung prediger ordenns Thun kundt vnnd bekenne offentlich mit disem brieff fur vnns vnnser closter vnnd all vnnser nochkome als
wir gehabt haben ganczen vnnd volkomen zehennt ader pension mit der lehenschafft der kirchen sand Bartholomei ym dorff Wazan, weliches dorff gruntlich vnnd erblich vnnsrn swestern
vnnser frawen ken Brunn zu gehorend ist an gefar zwoe meyln von Brunn ligendt, den wir von alder langezeit genossen rechtlich vnd erblich biß eher auch mit aller zuhorung der von
dann Jarlich komen vnd gefalln ist besessnn vnd in vnnserm nucz gewendet haben, So wier ader furderlich in getrawer lieb auß rechter begir fridlich sein geneygth zu eynikait, vnnd zu
vermeiden sollichn czwitracht, der durch solliche pension vnnd zehennd auch der lehenschafft der pfarkirchn offt von Jar zu Jar czwisscn vnß auff eyne tail, vnd in got bemelthn vnsern liebn
Swestern des genanten conuendt vnser frawen von Brun verloffen vnd zergangenn vnnd namlich von merglicher beswarnuß der pfarleutn, die vmb vnnd ynn derdurch erstandnn ist, vnnd
hinfur weiter verlauffnn mochte des andern tail, Sollich czwitracht zukunfftiglich zu entpfehn vnd auch zu vermeiden, Haben wir vorgemelte swester Katherina Priorin mit dem obge=
melthn ganczn vnnserm Conuendt, gemayniglich des Closters Sand Katheryn in der Stat zu Olomucz, mit guttem furnemen rechte gewissnn willnn vnd wolbedachtn mueth, Auch mit vnsers
hochwirdign in got vater Balthasar Doctor der heylign schrifft, gemeyn Prouincials zu Behem vnd Merhern prediger ordens, wissenn vnd verwillung, Den Eerwirdign vnnd andechtignn
Swestern muter Brigida priorin vnd dem ganczn conuendt vnser liebn frawen Swesterherberg genanth auch prediger ordens in der Stat zu Brunn, Jnn vnnd allen iren nochkomen
solliche pension ader Zehennt, fur frey, ledig, vnuerkumert, recht aigen, recht vnd redlich verkaufft, vnd zu kauffen gebn haben, Geben vnnd verkauffen, yn, die wissentlich in krafft
dits brieffs vmb Hundert gulden zu dreysig behemisch grossn den guldn zu rechnn, welche sie vnns also beraith gutlich darfur außgericht wolgewert vnnd bezalt, weliche wir furbas
zu pesserm nucz vnnd fromen vnsers Closters gewandt habn, Daromb wir sie vmb verachte Sum der hundert guld, hiemit genglich quitn ledig vnd laß sagen, Auch die lehenschafft
der pfarkirchn Sand bartholomei des obemelthn dorffs Wazan, auß nochfolgung obgenantes zehennds, hiemiet abtretten, vberantwurten, auffsagen vnnd zu In wendnn gancz volkomen als
wir die besessen habenn, doch mit sollicher weyß vnnd manug, das sie die gemelte pfarkirchn sandt Bartholomei mit eynem pfarrer getrewlich versorgn sallnn den gots dienst do zumeren
zu lob ere got dem almechtigem seine wirdn muter, vnnd zu selkait kristglaubign menschn, also das sie nu furbas ewiglich das genant Conuendt vnnd ire nochkomen den offtbemelthnn
zehenndt mit allen renthn, zinsßn, guldnn vnd zuhorug mit zambt der lehenschafft wie obn begriffn Jnnehabn, besiczn vnd zu yrem nucz wendn, als mit andern irn guttern handln sallnn an
alle vnnser vnnd meniglich von vnsrn wegn Jrrung, hinderniß vnd widerzprechung, vnd verzeihn vnns fur vns vnnser Closter vnnd nochkomen auch dar auff aller vnnser gerechtigkait, die
wir gehabt habn ader in einichn weg noch haben mochten, Vnnd ob hinfur icht brieff hantschriftt, vrkundt ader schriefft funden gezaigt oder furbracht wurdn offtbemelthn Zehend vnnd lehen=
schafft antreffund, die vnns ader vnnser nochkomen zu nucz vnd den gemeltn Swestern zu Brunn oder irn nochkomen zu schaden seyn mochtn, die sallen alle gancz krafftloß, vnmechtig vnd
tod sein, vnd in keyne schaden thuen ader pringen, an keine enden noch steten in keyner weyse nochweg, In rechten ader ausserhalb, an alle argelist vnd geuere, Des zu warm vrkundt
vnnd geczeugknus, Gebn wir diesn brieff versigelt mit der wirdign muter Priorin vnnd auch deß gancznn Conuendt anhengendnn Jngesigl, Auch zu meher kuntschafft hat vnnser Hoch=
wirdiger in got vater Balthasar Doctor der heyligenschriefft prouincial, seines amptes Jnsigl neben vnnserm lassen anhengen, Beschehnn zu Olomucz am freytag vor Sand Thoma
deß zwelffpotn tag, Nach Crist gepurdt Tausenntfunffhundertt vnd Jm Sechzehenn Jar.